Sumisioari errespetua deitzen diote
Gure herriko alkate sozialista sutan dago, bere alderdiko zinegotzi bati “gezurtia” eta “lotsagabea” deitu diotelako herritarrek. Errespetu falta salatu du, asaldatuta.
Antza, behekoek goikoei zor diegun zerbait da errespetua, ez alderantziz.
Euskaldunok bigarren mailako herritar bezala tratatzen, biztanleen parte-hartzea eragozten edota kiroldegiak pribatizatzen dituen alkateari eta bere udal gobernuari zor diegu errespetua.
Orokortutako joera da: irainik eta kritikarik ez dute onartzen gure zergak funtsik ez duen Abiadura Handiko Trenean xahutzen dituzten agintariek, diru publikoa lapurtzen dutenek, abortatzeko eta manifestatzeko eskubidea ukatu nahi digutenek, herritarrak borraz kolpatzen dituztenek, jendea etxetik kaleratzen dutenek, langileak egoera prekarioan mantentzen dituztenek…
Zeinen zinikoa, herritarroi errespetua guztiz galdu diguten boteretsuek begirunea eskatzea. Antza, behekoek goikoei zor diegun zerbait da errespetua, ez alderantziz. Beharbada, errespetuaren izenean helburua da nahi dutena egiten jarraitu eta herritarrek txintik ez esatea.
Horientzat guztientzat, irakasle bati lapurturiko hitzok: “Errespetua ez da inposatzen, irabazi egiten da”.
Iruzkinik ez
Trackbacks/Pingbacks