Genero eta familia eredu berriei buruzko liburuak haurreskoletan debekatu ditu Veneziako alkateak

Atalak: Gizartea, Hezkuntza

“Etxe barruan ‘aita 1’ eta ‘aita 2’ dei diezaiokete euren buruari gurasoek, baina eskola barruan, familia gehienek aita eta ama dutela hartu behar da kontuan”.

“Jean-ek bi ama ditu”, zentsuraturiko 49 liburuetako bat.

Homosexualitatea bezalako gaiak eskolan lantzeari ateak itxi dizkio hitz horiekin Luigi Brugnaro Veneziako alkate hautatu berriak. Bere iritziz, “gurasoak dira seme-alabak gauza hauetan hezi behar dituztenak, ez eskola”. Halako argudioen bidez, 49 liburu zentsuratu eta haurreskoletako liburutegietatik kentzeko agindu du.

Bestelako argudioak ere baditu alkateak. Jean-ek bi ama ditu ipuin frantziarra “aberrantea eta desegokia” iruditzen zaio, adibidez.

“Estereotiporik gabe irakurri” programako bilduma dira 49 ipuin-liburu horiek; 2014an Diskriminazioaren kontrako zinegotziak abiatutako ekimena. Genero estereotipoak apurtzea eta familia eredu berriak ikusaraztea dute helburu liburuek eta hainbat pedagogo eta psikologok osaturiko zerrenda da.

“Umeak isiltasunaren kulturan eta intolerantzian heztea da”

Debekuak polemika piztu du Italian. Lo Stampatello argitaletxearentzat, “dagoeneko ikusgarritasunik ez duten arazoak are ikusezinago bihurtzea, umeak isiltasunaren kulturan eta intolerantzian heztea da. Baita nerabezaroan neska-mutilek angustia handiagoa jasatea eta ezjakintasunak sortzen duen biolentzia bultzatzea ere. Haurtzaroan errepikatutako genero estereotipoak, gaztaroan kaiola bihurtzen dira. Gizon edo emakume izatea zer den gogoetatzeak, aske izatea zer den, auto-ezagutzan laguntzen du”.

30.000 sinadura aniztasunaren alde. “Izan errebelde eta irakur itzazu”

Ipuinok zentsuratzearen aurkako kanpainak 30.000 sinadura baino gehiago lortu ditu hiru egunetan, liburu debekatuen irakurraldi publikoak egiten ere hasi dira herrialdean eta hainbat liburutegitan jendea animatzen ari dira horiek irakurtzera, honako kartelekin: “Zerrenda beltzeko liburuak. Izan errebelde eta irakur itzazu”.

Italiako Hezkuntza Ministerioko idazkariorde David Faraone irmo mintzatu da: “Hezkuntza Ministeriotik ikastetxeetara bidali dugun eskutitza oso argia da: ikastetxeko langileak, irakasleak eta gurasoak dira ikastetxe horretako eskaintzari buruzko edozein erabaki hartu behar dutenak, eskolako liburutegi eta liburuei buruzko erabakiak barne. Zentzu honetan, alkate batek ezin du eskua sartu, are gutxiago agindu ikastetxe barruan zein liburu egon daitezkeen eta zeintzuk ez: hezkuntza komunitatearen erabakimena da hori. Eskolan pertsona guztien duintasunarekiko errespetua egon behar da, diskriminazio eta biolentzia ororen kontra”.

Zer gertatuko da?

Aferak hartu duen oihartzunaren ondorioz, Veneziako alkatetzaren bozeramaileak adierazi du udan zehar azterketa xehea egingo diotela 49 liburuen zerrendari eta horietako batzuen debekua atzera bota ahalko litzatekeela. Baina liburu bakar bat ere ez zentsuratzea da sinatzaileek nahi dutena, eta horretarako esku hartu dezala eskatu diote Italiako Hezkuntza ministroari.

Nafarroako Gobernuak 22 liburu zentsuratu zituenekoa

Politikariek hezkuntzan muturra sartzea ez zaigu berria, inondik inora; LOMCE dugu gertuko adibide garbia, baina ez bakarra. Veneziako kasuarekin antz handia du iaz bertan Nafarroan gertaturikoak: UPNk bere euskalfobia ikasgeletara eraman eta neurriak hartu zituen Euskara eta Literatura ikasgaiko 22 liburu erretiratzeko. Liburuak ez zetozen bat nabarrista espainolzaleen mundu ikuskerarekin.

Zentsuratutako liburuek genero estereotipoak apurtzea eta familia eredu berriak ikusaraztea dute helburu.