Zinemaldirako bost proposamen, eta trailerrak

Atalak: Zinemaldia 2015

Estreinaldiez eta eskaintza berriez gain, aurretik kritikak eta ikusleek goraipatutako filmak ere izango ditugu Donostiako 63. Zinemaldian. Dagoeneko arrakastaren bermea daramaten film horietako bost aukeratu ditugu:

El clan

Argentinan izugarrizko arrakastaz estreinatu da Pablo Traperoren azken pelikula. 80ko hamarkadan herritarrak asaldatu zituen Puccio familiaren gorabeherak ditu ardatz. Familia tradizional tipikoaren atzean, bahiketak eta hilketak eguneroko ogia ditu Puccio klanak. Traperok zuzendari onenaren saria eskuratu du Venezian.

[youtube width=”450″ height=”364″]https://www.youtube.com/watch?v=n7kpI79cPBk[/youtube]

Me and Earl and the dying girl

Nerabezaroa eta eskola, garai eta eremu gogorra edozein gazteren bizitzan. Modu dibertigarri eta hunkigarrian kontatu du hemen Alfonso Gómez-Rejón zuzendariak, Greg izeneko protagonistaren eskutik. Publikoaren eta epaimahaikideen txaloak jaso ditu aurtengo Sundanceko jaialdian.

[youtube width=”425″ height=”364″]https://www.youtube.com/watch?v=2qfmAllbYC8 [/youtube]

Saul fia (Son of Saul)

Gaia ezaguna zaigun arren (holokaustoa), ezberdina da László Nemes zuzendari hungariarraren filma. Auschwitzeko errausketa-labean lan egiten duen preso bat du abiapuntu eta deserosoa, iluna, garratza, boteretsua eta txundigarria dela diote ikusi dutenek. Cannesko epaimahaiaren sari nagusia lortu du aurten.

[vimeo width=”450″ height=”338″]https://vimeo.com/133125872 [/vimeo]

Taxi Téhéran

Iranen jazarpen instituzionala jasan duen eta bertako zuzendari garrantzitsuenetakoa den Jafar Panahi taxilari bilakatu da pelikula honetan. Kamera grabatzen jarri, eta taxira igo zaizkion bezeroen bizipenak jaso ditu, Teherango kaleetan barna eramaten dituen bitartean. Urrezko Hartza irabazi du Berlinen.

[youtube width=”450″ height=”364″]https://www.youtube.com/watch?v=5hYkteGqZfY[/youtube]

Karatsi (Losers)

Elena, Koko, Patso eta Gosho institutuko ikasleak dira. Koko Elenarekin maiteminduta dago eta euren arteko harremana ere aldatuko du mundu guztia aztoratu duen gertakariak: rock-banda ospetsuak jo behar du hirian. Nerabezaroan murgilduko da Ivailo Hristov zuzendari bulgariarra, aktore berrien freskotasuna eta zuri-beltzezko irudiak lagun. Moskuko zinema jaialdiko sari nagusia irabazi du filmak.

[youtube width=”450″ height=”364″]https://www.youtube.com/watch?v=3gatBufzGmA[/youtube]

Proposamen gehiago:

Gaizka Izagirreren B aldeko proposamenak.