“Me and Earl and The Dying Girl”. Zimikoa bihotzean

Atalak: Zinema, Zinemaldia 2015

Komedia dramatiko batzuk gai dira, istorioa eta egoera bortxatu gabe, barrea eta negarra eragiteko, bidean dibertitzeko, tristatzeko, hunkitzeko, eta emozio goitibeheraren amaieran, bihotzean zimiko baten sentsazioa uzteko. Halakoxea da Me and Earl and The Dying Girl.

Institutuan ikusezin izan nahi du Greg gazteak, urte zail horiek lasai igaro nahi ditu. Harik eta kontrolpean duen eguneroko horretan, leuzemia duen Rachel bizilaguna gurutzatzen den arte. Hortik aurrera, ohiko gaiak jorratuko ditu istorioak: laguntasuna, harreman sozialak, familia, nerabezaroko beldur, kezka eta lehentasunak… baina modu originalean kontatu ditu Alfonso Gómez-Rejón zuzendariak, protagonista bitxiak baliatuz, ikuslearekin jolastuz, gidoia keinu komikoz josiaz, une sentiberak tartekatuz.

Gainera, lagun-minarekin batera Gregek pelikula ezagunen bertsioak errodatzen dituela-eta, erreferentzia zinematografikoz beteta dago filma, eta erronka ere bada aipatzen diren pelikula guztiak identifikatzea. Kontuak kontu, badirudi kritika eta ikusleak harrapatzea lortu duela Gómez-Rejónen lanak: Sundanceko zine jaialdian epaimahaiaren sari nagusia eta publikoarena irabazi zituen.

PERLAK

Me and Earl and The Dying Girl

Zuzendaria: Alfonso Gómez-Rejón

Gidoilaria: Jesse Andrews

Aktoreak: Thomas Mann, Olivia Cooke, RJ Cyler, Nick Offerman, Molly Shannon, Jon Bernthal, Connie Britton.

AEB, 105 minutu.