“Son of Saul”: ahaztu holokaustoaz orain arte ikusitakoa

Atalak: Zinema, Zinemaldia 2015

Ahaztu holokaustoaz ikusi dituzun filmak, Auschwitzeko kontzentrazio esparruan barneratu eta ikuspegi ezohikoa eskaintzen baitu Saul fia (Son of Saul) pelikulak, bai edukian, bai forman. Artifiziorik, soinu bandarik eta eszena anpulutsurik gabe, soila eta gordina da emaitza, intentsua hasieratik bukaeraraino.

Auschwitzeko errausketa-labeetan lan egiten duen preso hungariarra da Saul; bertan hil dutenetako bat semea dela sinetsita, errabino bat bilatzea eta semearen gorpua behar bezala lurperatzea izango du helburu bakar. Detailez eta keinuz jositako trama bitxiak biziraupenaz, muturreko egoeratako erabaki eta harremanez eta kontzentrazio esparruen errealitateaz hitz egiteko balioko dio László Nemes zuzendariari. Finean, gizakion txikitasunaz eta handitasunaz mintzo zaigu, modu berezian.

Formalki, protagonistaren bizkarrari segitzen dioten sekuentzia-plano luzeak, kameraren mugimendu traketsak, eszena desenfokatuak, lehen plano itxi eta hertsiak, xuxurlatutako dialogoak eta argiztapen hitsa gauza dira klima estua, ezerosoa eta kasik agonikoa sortzeko. Saulekin batera egiten duen bidaian, ikusleak ez du sosegurik inongo momentutan, apenas ikusten den baina uneoro nabarmen antzematen den horrorean barna.

Bai, originala traman eta filmikoki handia da Son of Saul. Ziurrenik horregatik, epaimahaiaren sari nagusia irabazi du aurten Cannesko zinema jaialdian.

PERLAK

Saul fia (Son of Saul)

Zuzendaria: László Nemes

Gidoilariak: László Nemes, Clara Royer

Hungaria, 107 minutu.