“Black Mass”, gangsterrei buruz dagoeneko bagenekiena

Atalak: Zinema, Zinemaldia 2015

Bostonen kokaturiko thriller mafiosoa da Black Mass, eta generoaren barruan ongi mugitzen da, baina ez du bestelako ekarpenik egiten. Sentsatzioa dugu hamaika aldiz ikusitako trama, eszena eta diologoak errepikatzen dituela, Martin Scorsesek zuzenduriko pelikula baten bertsio kaskarragoa bailitzan.

Johnny Depp-ek ederki antzezturiko capoak (adi aktorearen karakterizazio bitxiari) gidatzen du Boston Hegoaldeko mafia, eta FBIko lagunarekin duen harremanak harilkatuko du istorioa, kasik mafiosoa baino are ustelagoa baita polizia bera. Entretenigarria da hasieran, Depp-en lan onaz gain aurpegi ezagunak ikusiko ditugu pantailan (Kevin Bacon, Joel Edgerton, Dakota Johnson…) eta Scott Cooper zuzendariak arau guztiak jarraituz ongi egin du bere lana. Baina beharbada horixe du akatsa: arau eta klixe guztiak bere egiten dituela, ez duela arriskatzen, mafiari eta gangsterrei buruz ikusi ditugun filmen nahasketa dirudiela, eta pelikulak aurrera egin ahala indarra galtzen duela.

Benetako gertakarietan oinarritzen den istorio mafiosoa da, 70eko hamarkadatik 90eko hamarkadako atxiloketetaraino kontatzen duena, baina ez da Zinemaldi honetan ikusi dugun bakarra. El clan filmak ere, 80ko hamarkada hasieran Argentinan jazotako hilketa eta bahiketak ditu abiapuntu. Hain juxtu, Blac Mass estatubatuarrari faltan bota dioguna lantzen du El clan-ek: generoari elementu berriak eta berritzaileak gehitzen dizkio, topikoetatik harago benetakotasuna lortuz eta emaitza borobilagoa eskainiz.

PERLAK

Black Mass

Zuzendaria: Scott Cooper

Gidoilariak: Mark Mallouk, Jez Butterworth

Aktoreak:Johnny Depp, Joel Edgerton, Benedict Cumberbatch, Rory Cochrane, Jesse Plemons, Dakota Johnson, Peter Sarsgaard, Kevin Bacon

AEB, 122 minutu.