Gizarte Zientziak unibertsitatetik desagerrarazi nahi dituzte Japonian

Atalak: Ekonomia, Hezkuntza

Zuzenbidea, Humanitateak, Soziologia, Literatura bezalako karrerak irakasteari uzteko eskatu die Japoniako Hezkuntza ministroak unibertsitateei, eta herrialdeko 60 unibertsitate publikoetatik 26k dagoeneko bat egin dute eskaerarekin.

Ikuspegi estrategiko murritza duen ekonomia eredu bati erantzungo dion irakaskuntza zabalduz doa, hezkuntza integralaren eta kritikoaren kaltetan.

Datorren ikasturtean arlo horietako ikasleak hartzeari edo ikasgaiak emateari utziko diotela jakinarazi dute 26 unibertsitateek, ministroak adierazi duelako “gizartearen beharrei hobeto erantzungo dieten alorretan” jarri behar dutela indarra; alegia, ikasketa teknikoak hobetsi behar dituztela.

Japoniako ekonomia suspertzeko Shinzo Abe lehen ministroak duen planteamenduari erantzuten dio neurriak, “hezkuntza praktikoagoa” eskaintzea helburu.

Japoniako Zientziaren Kontzilioko kideek adierazpena kaleratu dute, “erabaki administratibo honek humanitateen eta gizarte zientzien etorkizunean eta unibertsitatearen beraren kontzeptuan izan dezakeen eragin larriak kezkatuta. Letretako karrerei erantzun azkarrak eskatzea itsu jokatzea da. Estaliago dauden bestelako behar sozialak daude, unibertsitateek ase beharko lituzketenak, esaterako jakintza artikulatzea, aniztasuna finkatzea edota sormena loratzeko oinarriak jartzea”.

Hezkuntzaren ikuspegi ekonomizista, gero eta zabalduago, gero eta gertuago

Ikasketa akademikoak erabilgarritasun ekonomikoaren arabera antolatzea (ekonomia jakin baten mesedera arituko diren langile otzanak lortzeko, esan nahi baita) ez da joera arrotza. Unescok hezkuntzan hartu duen norabide ekonomizista salatu dute berriki; irizpide zalantzagarriak jarraitzen ditu PISA ebaluazioak (hein handi batean Europako eta munduko herrialde ugariren hezkuntza sistemak baldintzatzen dituen ebaluazioak); asmo horiexek daude LOMCE legearen atzean; eta baita hezkuntza merkaturatzeko eta pribatizatzeko Espainiako Gobernua prestatzen ari den Unibertsitate Erreformaren oinarrietan ere.

Ikuspegi estrategiko murritza duen ekonomia eredu bati erantzungo dion irakaskuntza zabalduz doa, hezkuntza integralaren eta kritikoaren kaltetan. Zorionez, politikariek hezkuntzan eskua sartzeko duten desioari uko egiten dio hainbatek. Tokioko eta Kiotoko unibertsitateek, Japoniako bi nagusienek, muzin egin diote Gobernuaren gomendioari.