Etxean 24 errefuxiatu hartu dituen bikotearen esperientzia

Atalak: Gizartea, Nazioartea

“Beste batzuk laguntzeko prest egon zaitezke, edo beldurra izaten jarraitu dezakezu”, dio Voltzek.

Siria, Irak eta Afganistango 24 errefuxiatu izan dituzte etxean, pasa den uztailetik, Alemaniako Dirk Voltz eta haren bikotekideak. Beldurraren mezua zabaltzen dutenen aurrean, bizitako esperientzia aberasgarria kontatu du Voltzek sare sozialetan, eta lau haizetara zabaldu da bere idatzia.

“Irak edo Siriako gonbidatuak etorri aurreko leku berean jarraitzen dute labainek (…) tipula, baratxuria eta haragia ‘hiltzeko’ baino ez dira erabili –dio, ironikoki–. Hemen egon diren musulmanek ez gaituzte iraindu bi gizon elkarrekin oheratzen garelako [bikote homosexuala dira], inork ez du Islamaren legea jarri konstituzio alemaniarraren gainetik, denak daude penatuta euren herrialdetik ihes egin behar izan dutelako…”.

Hainbat hedabide, agintari eta taldek –interesatuki– astindutako topiko arrazistei, herritarren artean zabaltzen saiatzen diren paranoia xenofoboari, eta Europaren ustezko musulmanizazio eta islamizazioaren beldur funsgabeari esperientzia errealetik erantzun nahi izan die Voltzek.

Heriotza-mehatxuak, kanpotik

Hain juxtu, esperientzia honen alde txarra ez dute etxe barruan bizi izan, Alemaniako herritarrengandik baizik, kalean heriotza-mehatxuak jaso dituztela eta eskutitz iraingarriak iritsi zaizkiela kontatu baitu.

“Krisiari aurre egin ordez, negar egiten dutenei, esnatu behingoz!” esan die Voltzek. “Beste batzuk laguntzeko prest egon zaitezke, edo beldurra izaten jarraitu dezakezu. Baina pena ematen didate izuturik bizi direnek”.

Bere idatziak jasotako erantzun baikor andanen ostean, eskerrak eman ditu berlindarrak. “Itxaropena badagoen seinale”.

2.300 kidetik gora, etxea partekatzeko prest

Facebookeko Place4refugees taldearen bidez hartu ditu errefuxiatuak bikote honek. Berlinen 2.300 kidetik gora ditu taldeak eta errefuxiatuak eta boluntarioak jartzen ditu harremanetan.

Dirk Voltz (eskuinekoa), etxean hartutako errefuxiatu birekin.