“Ez goaz gu harrian kontra, harriak jotzen gaitu gu”

Atalak: Politika

Dispertsioaren amaiera, preso gaixoen askatasuna eta salbuespenezko legedia bertan behera uztea eskatuko dute larunbatean Bilbon eta Baionan, Mugitu daitezen harriak lelopean. Irungo Kabigorriko bertso-saioan gaiaz aritu da Odei Barroso Urruñako bertsolaria:

Baiona eta Bilbo zer dira?

Herri bat eta bi mundu:

denok berdina aldarrikatzen

dugu segunduz segundu.

Familiei eta presoei

nork behar die lagundu?

Gure bidean jada aspaldi

harri bat topatzen dugu,

baina ez goaz gu harrian kontra,

harriak jotzen gaitu gu.

Eta zer erran gaur daukagunaz?

Anitz bizi dira nekez,

anitz kartzelan usteltzen dira

ta ez soilik urtebetez.

Denbora hortan familia ta

ingurukoak negarrez,

gure herria aspaldi dago

harri bihurtu beharrez.

Altxatzen jada ikasi gendun

baina paretik kentzen ez.

Beraz harrien kontuan zail da

gure paretik mugitzen,

aspaldi ohitu omen ginen gu

bideko papurrak biltzen.

Herriak hitza hartu behar du

nahiz ez duten konprenitzen,

ikas dezagun aurrera egiten

gure ideia ta izen,

harri hoiekin gure biharko

herri hori eraikitzen.