Ongi etorri Gipuzkoara… aberatsa bazara

Atalak: Ekonomia, Gizartea

Bai EAJk bai PSEk gogor kritikatu zituzten Javier Maroto eta popularrak, hainbat kolektibori Diru-Sarrerak Bermatzeko Errenta ukatu nahi izan zietelako. Orain Gipuzkoako Foru Aldundia da Diru-Sarrerak Bermatzeko Laguntzak kenduko dituena, eta PPk egin zuen bezalaxe, orain EAJ da etorkinak diru-laguntzetatik bizitzera datozela iradoki duena.

Ekonomikoki ahulak are gehiago baztertzea eta aberatsak are gehiago babestea, hori bai gizarte artifiziala, batzuek eraiki nahi dutena.

Laguntza horiek “migrazio isuri artifiziala” eragin omen dute, “erakartze efektua”, Maite Peña Gizarte Politikako legebiltzarkideak argudiatu duenez. Diru-laguntza horrek ez duela gizarteratzeko balio ere gaineratu du. Baina delako txosten teknikoak zenbat du teknikotik eta zenbat politikotik? Zein datu ditu oinarri? Zer da migrazio “artifiziala”? Etorkin uholdea bizi dugu Gipuzkoan eta ez gara konturatu ere egin? Jakina, jendeak nahiago du lan eta bizi baldintza onenak eskaintzen dizkion gizartean, gizarte osasuntsuaren isla da hori, herritar guztion eskubideak eta beharrak bermatzen dituen gizartearen isla; horren ordez beste behin mamu xenofoboa astindu dute –EAEn biztanleei etxebizitza bermatzeak kanpotik jendea “masiboki” erakarriko zuela esatera iritsi zen Josu Erkoreka jeltzalea– eta kanpotik gure dirua xahutzera etorriko direla saldu nahi digute, orain arteko azterketa eta datuek beldurraren diskurtso hori gezurtatzen duten arren. Sakonean, xenofobia horrek pobreenganako fobia estaltzen du, Gipuzkoako Aldundia profil jakin batentzat gobernatzen ari dela erakusten ari zaigulako. Bestela, Peñak dioen gisan laguntzak lurralde osoan “modu homogeneoan” eman behar badira, zergatik ez die proposatu Gipuzkoak alderdikide dituzten eta Bizkaiko eta Arabako aldundiak gobernatzen dituzten EAJ-PSEri –baita Nafarroako Gobernuari ere– laguntza berdinak bermatu ditzala, Gipuzkoan eskubide hau ezabatu beharrean? Zergatik gobernura iritsi eta fortuna handien gaineko zerga erreformatzea –hots, aberatsek zerga gutxiago ordaintzea– izan da Markel Olano Gipuzkoako ahaldun nagusiaren helburu nagusietakoa?

Ekonomikoki –sozialki– ahulak are gehiago baztertzea eta aberatsak are gehiago babestea, hori bai gizarte artifiziala, batzuek eraiki nahi dutena.

Ostiralean, hilak 15, Gipuzkoako Foru Aldundiak hartu duen neurriaren kontrako kontzentrazioa egingo dute Donostiako Gipuzkoa Plazan, 19:00etan.