Leok ez du homosexuala izan nahi

Atalak: Zinema

Leo eta Caro, Leoren logelan.

“EL CUARTO DE LEO”. Biarritzeko Zine Jaialdiko Sail Ofiziala
Bere txikitasunean, handia da Buchichioren lehen film luzea, mezu potolorik bilatu gabe bi pertsonen gorabeherak kontatzen baitizkigu, arazo pertsonal bezain unibertsaletan sakonduz, mimo handiarekin, goxotasunez. Norberak bere burua onartzea, ingurukoak dezepzionatzeko beldurra izatea edota depresioan erortzea bezalako gai intimoak goxotasunez kontatzekoak baitira. Biarritzeko Hego Amerikako Zine eta Kultura Jaialdiak eskainiko du El cuarto de Leo.

Logela da Leoren “armairua”: eroso dago bertan, eta horra eramaten ditu Interneten bidez ezaguturiko mutilak, neskalagunarekin moztu ostean bere burua argitu behar duelako. Carok aldiz, ohean hartu du aterpe, depresioak jota, gutxi ateratzen da kalera, eta horietako batean, Leok eta Carok elkar ezagutuko dute. Baina logelan eta ohean euren mundutxoa sortu badute ere, bizitza kanpoan dago eta lehenago edo beranduago, ateak ireki eta errealitateari aurre egin beharko diote.

Geure burua ulertzeaz eta munduan gure lekua bilatzeaz mintzo da Buchichio, eta ederki egiten du, leziorik eman gabe, hausnarketa sakonik egin gabe, pertsonaiei hitz egiten, bizitzen eta deskubritzen utziz.

Biarritzeko Jaialdia gaur hasi eta urriaren 4an amaituko da. El cuarto de Leo filmaz gain, beste bederatzi lehiatuko dira Sail Ofizialean:  Los paranoicos, Os famosos e os duendes da morte, La Nana, Ilusiones ópticas, La pasión de Gabriel, La sangre y la lluvia, El cuerno de la abundancia, 5 días sin Nora eta La Yuma.

El cuarto de Leo
Zuzendaria eta gidoilaria: Enrique Buchichio
Aktoreak: Martín Rodríguez, Cecilia Cosero, Gerardo Begerez, Mirella Pascual, Rafael Soliwoda.
92 min.
Uruguai