“Haurtzaroa medikalizatzeko historiako kanpaina handienaren aurrean gaude”

Atalak: Ekonomia, Osasuna

“Hemendik urte batzuetara, haurrak gehiegi medikatzeagatik sortutako gaixotasunez kezkatzen hasiko gara eta ea nola desegiten dugun egindako guztia”. Miguel Jara da mintzo dena, osasun gaietan espezializatutako kazetaria.

Hiperaktibitateari buruz elkarrizketatu dute Jara, hiperaktibitateagatik medikatuta dauden haurren portzentajea handia delako eta hazten ari delako. Garbi du kazetariak, laborategi farmazeutikoak daude atzean, gizartean kanpaina bortitza eginez, psikiatra eta medikuak “erosiz”, politikariengan eraginez edota ikastetxeetan diagnostikoak bultzatuz (modan dago irakasleak ikasle “mugituen” gainean egotea eta sarri irakasleak aurrez diagnostikatuta iristen dira haurrak medikuarenera).

“Herritarrei beldurra sartzeko modu planifikatua da, gurasoen sentimenduez aprobetxatzea”

Estrategiarik zikinenetakoa, diagnostikatuen eta senideen elkarteak finantzatzea eta diseinatzea dela nabarmendu du, PANDAH plana kritikatuz. “Seme-alabak jarrera oso mugitua duenean, guraso asko urduri jartzen dira, zerbait berria eta estresagarria da eurentzat, eta medikalizazioaren bidea hautatzen dute. Beharbada, kausak gehiago arakatu beharko lituzkete, baina guraso hauek ulertzen ditut, egoera batzuk nahiko kontrolagaitzak direlako. Atzean, ordea, beldurraren estrategia dago, gurasoei beldurra sartzen die industriak. PANDAH planean esaten da hiperaktibitatea duen eta medikatzen ez den umeak aukera handiak dituela etorkizunean gaizkilea edo perbertitu sexuala izateko. Herritarrei beldurra sartzeko modu planifikatua da, gurasoen sentimenduez aprobetxatzea. Eta dena, medikamentu baten kontsumoa sustatzeko helburuz”.

“Sintomek gehiago erantzuten diote gure gizarte konplexuari, osasun arazoei baino”

Miguel Jararen hitzetan, “guraso batzuek hiperaktibitatea gaixotasuna dela defendatzen dute sutsuki, beste batzuek uste dute sintomek gehiago erantzuten diotela arazo sozialei, gure gizarte konplexu eta hiperaktiboari. Egungo egitura sozialak arrastoa uzten du haurtzaroan eta sintomak gehiago dira hezkuntza, gizarte eta familia arazoen isla, osasun arazoa baino”. Alegia, ez ote da izango, hiperaktiboak baino, gaur egungo gizarte eredu eta erritmora egokitutako haurrak direla?

Irmoa da kazetaria: “Hiperaktibitatea tratatzeko erabiltzen diren medikamentu nagusiak arriskutsuak dira, menpekotasuna sor dezakete, ondorio oso larriak dituzte (epe luzera oraindik ikusi ez ditugunak) eta eraginkortasun oso gutxi dute”.

Gaiaz gehiago:

Haur hiperaktiboz beteta omen daude ikasgelak