“After the storm”, Koreeda bete-betean

Atalak: Zinema, Zinemaldia 2016

Berriz ere familia eta familiarteko harremanak dira Hirokazu Koreedaren After the storm filmaren oinarria; berriz ere tonu eta erritmo pausatuan kontatu digu istorioa; eta berriz ere, harrapatu egin gaitu zuzendari japoniarraren unibertsoak.

Ryota dibortziatuta dago, hilean behin ikusten du semea eta hondoa jo du profesionalki. Gainera, apustu munduaren zaleegia da. Iraganari begira bizi da, garai hobeagoetako bizimodua amets, harik eta emazte ohiak, semeak eta hirurek batera gau bat pasa beharko duten arte, Ryotaren amaren etxean. Koreedaren zigilua daraman filmak klase ertaineko familia baten erlazio eta sentimendu amaraun konplexua du aztergai –ohiko legez–, intimista eta hunkigarri batzuetan, umoretsu besteetan, gordinago hainbatetan. Ilusioak desilusio bilakatzen direnean ere, hutsegiteek atzera bueltarik ez dutenean, bizitzan aurrera jarraitu behar da, iragana ezin dugulako aldatu, baina oraina eta etorkizuna bai.

Sentsibleria ñoñorik gabe, dotorea da narrazioa, zuzendari japoniarraren estiloan. Aurreko filmekin ere hala erakutsi digu, tartean Donostiako Zinemaldiko beste edizio batzuetan publikoaren saria jaso duten Like father, like son eta Our Little Sister lanekin, beti ere familia erdigunean.

PERLAK

After the storm

Zuzendari eta gidoilaria: Hirokazu Koreeda.

Aktoreak: Abe Hiroshi, Maki Yoko, Yoshizawa Taiyo, Kiki Kilin.

Japonia, 120 minutu.