Indarkeria matxistatik askatzeko hamahiru narrazio

Atalak: Indarkeria matxista, Literatura

“Indarkeria matxista salatzeko pankartaren atzean jartzetik harago, alde tragikoan geratzetik harago, biolentzia matxistarik gabeko gizartea nola lortu hausnartzeko ariketa jendarteratu nahi genuen eta hala sortu zen Asun Casasola aktibistaren omenezko ipuin-lehiaketa”. Bi edizio eta 500 ipuin baino gehiagoren arteko aukeraketaren ostean, gogoetagai hori duten 13 ipuinez osaturiko liburua aurkeztu dute: Gogoratzen nauzuenetan.

Ipuinen irakurketa musikatua, Irunen. Azaroaren 19ko liburu aurkezpena ere halakoa izango da.

“Liburua gure aliatua izatea nahi dugu”

“Sarritan ezinezkoa iruditu bazitzaion ere, lortu du, milaka aldiz erortzeko zorian sentitu bazen ere, lortu du”. Lehenengo edizioko euskarazko ipuin irabazlearen azken hitzak dira horiek, adibide txiki bat baino ez. Mezu beraren bueltan erpin anitzei heltzen diete liburuko ipuinek: maskulinitate eredua, erlijio katolikoaren garrantzia, hezkuntzak haurrengan duen eragina… “Ipuin-lehiaketaren lehenengo bi edizioak oso arrakastatsuak izan dira, 500 altxor genituen eskuartean, eta altxor horietako batzuk betiko gordetzeko aukera emango du orain bildumak. Liburua gure aliatua izatea nahi dugu, ikastetxeetan lantzeko eta gogoetatzeko tresna bat, gizartean eragiteko tresna… bestelako jendarte eredu bat eraikitzeko bidean”, adierazi digu Txingudi Anti Sexistako kide Oihana Llorente Arretxeak.

Casasolaren borroka, eredu

Ipuinetatik zazpi euskaraz dira eta sei gaztelaniaz. Eta ipuin bakoitza emakume ilustratzaile ezberdin batek irudikatu du. José Diego Yllanes-ek Nagore Laffage irundarra hil zuen 2008ko Sanferminetan. Laffage herrikidearen eta indarkeria matxistaren biktima guztiak, “haietaz oroitzeak sortzen duen energia” islatu nahi du izenburuak: Gogoratzen nauzuenetan. Hain juxtu, Laffageren ama, Asun Casasola, aktibista nekaezina da, alabaren hilketagatik justizia egiteko, gertakaria ahanzturan ez erortzeko eta indarkeria matxista amaitzeko lanean. Haren borroka eredu dute bai Txingudi Anti Sexistak bai ipuin-lehiaketak berak ere.

Liburua auzolanean egindako ekarpena dela eta egileak buru-belarri inplikatu direla azpimarratu digu Oihana Llorentek, sare majoa sortu dela proiektuaren inguruan. Azaroaren 19an, liburuaren aurkezpen musikatua egingo dute Irungo Kunsthal diseinu eskolan, 12:00etan. Aurkezpen gehiago etorriko dira ondoren, ilustratzaileek ekimen artistikoa eskainiko dute azaroaren 25ean, ikastetxe ugaritara egingo dute bisita liburuarekin eta Durangoko Azokan ere izango dira, besteak beste.

Liburua eskuratzeko: asuncasasolaipuina@gmail.com

Duela bi edizioko ipuin sarituen irakurketan, Asun Casasola hunkituta.