Erditze gelatik zuzenean azterketara: tratu bidegabea ala fabore-tratua?

Atalak: Diskriminazioa, Sexismoa

Erditu berritan, lorik egin gabe, oraindik epiduralaren eraginez hankak ezin mugiturik eta odola zeriola, ebakuntza gelatik zuzenean ospitaleko beste gela itxi batera eraman zuten, gurpildun aulkian, oposaketetako azterketa gainerako hautagaien une berean egiteko. Deskantsatzen ez utzi izana eta azterketa baldintza negargarrietan egin izana salatu du Madrilgo emakume batek, baina kritiken jomuga ere bihurtu da emakumea bera, hainbatek dioelako haurdunek fabore-tratua jasotzen dutela azterketa hauetan, istripu edo ezbeharren bat dutenei ez zaielako aukera hori ematen.

Harritu egin gaitu, kasua kontatzen duen artikuluko erantzunetan zenbatek uste duten emakumeak ez duela inongo arrazoirik kexatzeko; are gehiago, diskriminatutakoak oposaketara aurkeztutako gainerako guztiak direla diote, esaterako istripu batengatik ospitalean bukatuz gero ez dizutelako azterketa bertan egiteko aukerarik ematen eta hortaz haurdunekin egiten dena pribilegioa delako (epaimahaiko kide bat gerturatu zen Madrilgo ospitalera, erditu berriari azterketa egitera). Ama izatea emakume horren aukera pertsonala izan dela diote, bazekiela hori gerta zitekeela eta ondorioak bere gain hartu behar zituela. Haurdun ez dauden guztienganako diskriminazioa salatzen duten hauek, indar berarekin salatuko ote dute ama izateagatik (edo ama izango direla esate hutsagatik) lana ukatzen zaien emakumeek jasaten duten diskriminazioa?

Umea izatea aukera bat da, bai, baina ez bakarrik emakumearena

Erantzunen artean, protagonistarekin bat egiten dutenak ere badira, azterketa egiteko baldintza egokiak ez direla salatuz eta ama izan berriaren eskubideak defendatuz (legeak berak dio oposaketak egiteko aukera bermatu behar zaiela haurdunei, azterketa lekura joan ezin dutenean). Umea izatea aukera bat da, bai, baina ez bakarrik emakumearena, gizonek ere aukeratzen dute seme-alabak izatea. Aldiz, erabaki beraren ondorioak ezberdinak dira batzuentzat eta besteentzat, eta adibide garbia da oposaketena: aita izango den (edo izan berri den) gizonak ez du arazorik izango azterketa egitera joateko; emakumeak izan dezake arazorik. Haurdun geratzearen erabakiak gehienbat emakumearengan sortzen ditu ondorioak, eta desoreka horiek neurri batean orekatzera dator legea.

Bide batez, lo pixka bat egiten utzi ziezaioketen emakumeari, eta azterketa gainerakoek baino beranduxeago egin zezala. Ondoan epaimahaikidea baldin badago, ziurtatu dezake adibidez denbora horretan guztian ez dituela mugikor bidez azterketako galderak jaso. Sen ona gomendatuko genioke administrazio publikoari, eta emakume honek jasotako tratua pribilegiatua izan dela diotenei, enpatia apur bat gehiago.