Hiru dimentsioko klitoriak, sexu-heziketa osasuntsurako tresna

Atalak: Gorputza, Sexua

Historikoki protagonismo gutxi eman zaio klitoriari, liburuetatik desagertzera iristeraino. Gaur egun oraindik organoaz ezezagutza handia dagoela ikusita, hiru dimentsiotan inprimatutako klitoriak tresna eraginkorra dira, “sarri mito eta tabu izaten jarraitzen duen edo errua, beldurra eta lotsari lotuta dagoen sexu-organo honen irudi zehatza ikusarazteko eta normalizatzeko”.

“Baginan zentratzen da diskurtsoa”

Gorputza ezagutzeko bakarrik ez, sexu-praktikarako ere garrantzitsua da klitoria ongi ezagutzea, baina gaur egungo sexu-heziketan oraindik ez dela hari buruzko informazio nahikorik ematen dio Soraya Calvo sexologo eta pedagogoak. Horren erakusle, tailerretako gazte eta heldu asko harritu egiten direla 3Dko klitoriekin, maiz klitoriaren glandeaz baino ez delako hitz egiten, eta ez organo osoaz. “Gizakion sexualitatea tradizionalki ugalketara lotu dugu, koitora. Plazera bigarren maila batean geratzen da, bulbaz ere ez da hitz egiten, baginan zentratzen da diskurtsoa. Aipatzen ez dena, ez da existitzen, eta informaziorik gabeko herritarrak, lo dauden herritarrak dira”.

Klitoria 3Dn inprimatzeko ereduak badira interneten. Mélissa Richardek sortutakoa, adibidez, 7×10 zentimetrokoa da, baina nabarmentzekoa da klitori guztiak ez direla berdinak.