Haurrentzako animazioan homosexualitatea normalizatzen

Atalak: Homosexualitatea, Sexua, Zinema

Haurrei zuzendutako film eta marrazki bizidunetan tabua dira oraindik LGBT pertsonaiak. Horregatik da berezia In a heartbeat, bi mutikoren arteko maitemintze istorio homosexuala gai nagusitzat duen animaziozko lehen laburmetrai gisa aurkeztua. Bi ikaslek egin dute eta estreinatu aurretik arrakasta handia lortu du jada.

Beth David eta Esteban Bravok Floridako Arte eta Diseinu Eskolan aurkezturiko tesitik jaio da pelikula. Jasotako kritika onak ikusita, soinu-banda egin eta film bihurtzeko diru-bilketa abiatu zuten interneten, crowdfounding bidez: 3.000 dolar eskatu eta 14.000 eskuratu dituzte. Trailerra (behean ikusgai) arrakastatsu ari da mugitzen sarean eta azken emaitza uda honetan estreinatzea da asmoa, interneten doan deskargatzeko moduan.

Dialogorik gabeko labur honetan, mutiko lotsati bat da protagonista eta ezkutuko sentimenduak agerian utz ditzake bere bihotzak, bularretik atera eta ametsetako mutikoaren atzetik abiatzea erabakitzen baitu bat-batean. “LGBTI direla onartzeko arazoak dituzten ume eta gazteei helarazi nahi diegun mezua da norbere burua onartu eta maitatu dezatela”, diote zuzendariek.

“Errealitatea ukatzen ahalegintzea”

Keinuren bat edo beste ikusi dugu azkenaldian: lesbiana bikotea Finding Dory pelikulan, bi emakumeren arteko musua Steven Universe eta bi mutilena Star versus the Forces of Evil marrazki bizidunetan… Beti ere bigarren mailako pertsonaia gisa eta beti ere polemikaz inguratuta, ume xaloei heterosexualitatetik haragoko ereduak erakustea umeak perbertitzea delakoan. Zentsura ere ezaguna zaigu halakoetan, baina zentsuratzea “gizarteari bizkarra ematea da, identitate, maitasun eta sexu-harreman desberdinak existitzen direla ukatzen ahalegintzea. Are gehiago, haurren sexu-hezkuntza osasuntsuaren kontra egiten du”, Iratxe Fresneda irakaslearen esanetan.

Ziurrenik polemikak saihesteko eta ekonomikoki errentagarriagoa izateko, animazioaren industriak eta produkzio-etxe handiek apenas egiten dioten lekurik LGBT komunitateari. Arlo honetan ere, ekimen alternatiboetatik bultzatuko da normalizazioa, seguruenik.

Trailerra:

Gaiaz gehiago:

– Lehen aldiz pertsonaia esplizituki homosexuala izango du Disneyren film batek

– Homofobia? Ze homofobia?