“The third murder”. Justizia hizki larriz

Atalak: Zinemaldia 2017

Zergatik hil du Misumik bere nagusia? Abiapuntu horri tiraka, epaiketa-filma da The third murder, eta generoari leial, estrategia legalez eta sistemaren lehentasunez mintzo zaigu pelikula, ez dira falta istorioa konplikatzen eta itxuraldatzen duten ezusteko bihurguneak. Baina inork ez dezala espero Perry Mason bat, ez ohiko thriller bat. Honek Koreedaren zigilua darama.

Zeinek du besteak epaitzeko zilegitasuna? Zergatik kondena dezake epaileak pertsona bat heriotza-zigorrera eta ezin diezaioke herritarrak ongia egin nahian beste bati bizitza kendu? Zer da JUSTIZIA, hizki larriz? Galdera potoloak planteatzen ditu Hirokazu Koreedak, hilketa bat argitzea aitzakia hartuta. Like father, like son lanarekin hunkitu gintuen zuzendaria aldendu egin da ohituta gauzkan giroetatik, eta epaitegietara egin du salto, abokatu bulegoetara, kartzela atarira; baina hara non, bizi-bizi dago hemen ere bere unibertsoa: familia, gurasoen rola, seme-alabekin duten harremana, pertsonaia sakonak…

Donostiako Zinemaldira ohituta, harrera ona izan du aurrekoetan zuzendari japoniarrak gurean eta Publikoko Saria irabazita du lehendik. Erritmo pausatuz, giza-emozioak arakatzen eta harremanen erroetara jotzen maisu da Koreeda, eta azken lan honetan ere segituan antzemango dute hori guztia haren jarraitzaileek.