“The Leisure Seeker”. Zaharra, baina bizirik

Atalak: Zinemaldia 2017

Bai, zaharrek ere desio sexuala dute, eta bizitzaz gozatu nahi dute, maitasunaz. Eskubidea dute erokeriaren bat egiteko, euren kabuz erabakitzeko, aske izateko… eta gustuko ditugu hori guztia gogorarazten diguten filmak.

Hanekeren Amour filmak ere adineko bikote baten elkarrenganako maitasun itzela zuen gai nagusi, baina hura oso europarra zen, eta guztiz estatubatuarra da The Leisure Seeker, horrek duen alde on eta txarrekin. Bizitzaren amaieran dagoen bikote baten abentura kontatzen du filmak, seme-alabak haserretuko dituen abentura: inori ezer esan gabe, autokarabana hartu eta azken bidaia egingo dute elkarrekin. Zahartzaroaz ematen duen ikuspegia (zahartzaroa bera pelikularen protagonista izatea bada plus bat) eta zuzenean edo zeharka ukitzen dituen gaiak dira interesgarriena: zaintza, heriotza, dementzia, bikote harreman baten gorabeherak, familia, gainbehera fisikoa… eta ororen gainetik, maitasunaren indarra.

Bi aktore protagonistek sostengatzen dute pelikula, eta aitortu beharra dago, bikain daude biak: emakume kementsua eta tinkoa da Helen Mirrenek antzezten duena; garai batean izan zenaren distira batzuetan argi bestetzuetan itzalia da haren senarra, Donald Sutherlandek gorpuztua.

PERLAK

The Leisure Seeker

Zuzendaria: Paolo Virzi.

Gidoilariak: Paolo Virzi, Stephen Amidon, Francesca Archibugi, Francesco Piccolo

Aktoreak: Helen Mirren, Donald Sutherland

Italia, 96 minutu.