Zer da doktrinatzea eta zer heztea?

Atalak: Hezkuntza

Kataluniari egokitu zaio orain, baina Euskal Herrian ere ohituta gaude, ikastetxeetan doktrinatzen dela entzutera. Beste behin, politikakeria egiteko arma bihurtu dute hezkuntza, eta irakasleen lan ona da jomuga. Baina hona sekretu bat: neutraltasuna ez da existitzen, ez fio kontrakoa saltzen duenarekin. Batzuentzat baloreetan heztea dena besteentzat manipulazioa eta doktrina dira, eta alderantziz.

Neutraltasunaren mozorroa darabilten hedabideak datozkit gogora, zintzo aurpegia jarrita proiektu “neutroak” aurkezten dituzten agintariak, lege eta epaiketa “neutroak”. Eskolan ere, ez da berdina ikasgai –eta hizkuntza– bati edo besteari eskaintzea arreta gehien, Geografian mugak harago edo honantzago jartzea, Historian bertsio bat edo bestea irakastea, Erlijioa edota Sexualitatea ematea/ez ematea… Munduari zein betaurrekorekin begiratzen diogun –eta haurrei zein betaurreko janzten dizkiegun–, horra gakoa. Ez, irakaskuntza neutrorik ez da existitzen, ezta nahi ere! Nik behintzat, eta errealitatean dagoen aniztasuna ezkutatu gabe, oinarrizko balore batzuk defendatzen dituzten irakasleak nahi ditut.

Onena, iritzi propioa garatzeko tresnak ematea

Eskolan, etxean, telebistan jasotzen duen eraginak lagunduko dio haurrari bere mundu-ikuskera eratzen, garrantzitsua da beraz zein eduki eta balorek nahi dugun osatzea inguru hori, baina haurra ere borondate propioa eta erabakimena duen pertsona izanik, pentsamendu kritikoa eta iritzi propioa garatzeko tresnak ematea da egin dakiokeen oparirik onena, eta bereizten duena zer den doktrinatzea eta zer heztea.