BabyPISA: 5 urteko haurrei ere azterketa egin nahi diete

Atalak: Hezkuntza

15 urteko gazteei egiten dieten PISA probak badakigu nola eragiten duen ikastetxeko jardunean, eskolan emango diren edukietan eta herrialdeen hezkuntza politikan. Orain arte, bestelako heziketa garatu ahal izateko askeago aritu dira Haur Hezkuntzan, baina PISA bat prestatzen ari dira 5 urteko haurrentzat, horrek ekarriko dituen ondorio guztiekin.

PISAren atzean dagoen erakunde ekonomikoa (ELGE) da txikientzako azterketa prestatatzen ari dena. Une hauetan, proba pilotua martxan dute Ingalaterra eta AEBetan. Herrialde gehiagotan ere egin nahi izan dute, baina hezkuntza komunitateek presio egin diete euren gobernuei, halakorik ez onartzeko; tartean dira Kanada, Frantzia, Alemania, Japonia, Norvegia, Zeelanda Berria, Suedia eta Danimarka.

“Neurgarria den horretara mugatuko da haur hezkuntza: alfabetizazioa eta aritmetika”

Hezkuntza komunitatearekin kontrastatu gabeko proba pilotuak haurraren trebezia kognitibo eta sozioemozionalak neurtzea du helburu eta horretarako tablet batean hainbat ariketa egingo ditu ikasleak, “alfabetizazioa, aritmetika, funtzio exekutiboa, enpatia eta konfiantza” ebaluatzeko, erakundearen esanetan. Baina oraingoan ere, errendimendu akademikoa eta zenbakitan neurgarria dena neurtuko du umeentzako PISAk, eta oraingoan ere, aniztasuna kanpoan utziko du ebaluazio estandarizatu eta unibertsal honek. Argi du Helge Wasmuth irakasleak: “Azkenean, neurgarria den horretara mugatuko da haur hezkuntza: alfabetizazioa eta aritmetika, eta proba hauetan emaitza ona ateratzeko, hezkuntza planak horretara bideratuko dituzte herrialde askok, aurretik gertatu den bezala”.

Proba pilotuko datuak bildu ondoren, azterketa herrialde gehiagotara zabaltzea baita asmoa. “Benetan umeen onurarako da etsamina hau? Hezkuntza jarduna hobetzeko balioko du? Ala urrats bat gehiago izango da interes pribatuei ateak zabaltzeko?”, dio Wasmuthek. Ikasleen garapen osoa aintzat duen ebaluazio hezigarria lantzen dute gero eta ikastetxe gehiagotan, baina alferrik da, hezkuntzaren ikuspegi ekonomizistan sakontzen jarraitu nahi dute agintzen dutenek.