Ikastetxeetako “biolentzia sotila”

Atalak: Hezkuntza

Espainiako Estatuko erkidego guztietako Lehen eta Bigarren mailako hainbat irakasleri galdetu diete, eta 10 irakasletik 9k esan dute biolentzia egoerak bizi dituztela euren ikastetxeetan, bai ikasleen artean, bai ikasle eta irakaslearen artean. Borroka, irain eta mehatxuez gain, “intentsitate baxuko biolentzia normalizatua” nabarmendu dute, egunerokoan ikasgelako giroa gaiztotu eta tentsio-egoera sortzen duena.

Hain juxtu, ezkutuago geratu ohi den biolentzia sotil horretan jarri dute arreta inkestaren egileek: ikasleak beste ikasleei eta irakasleari errespeturik ez izatea, gaizki erantzutea, klasea moztea… Normalizatzen ari diren jokabideak direla diote, elkarbizitza arazo bat sortzen ari dela eskoletan, eta prebenitzea eta soluzioak bilatzea beharrezkoa dela. Galdekatutako irakasleen %75ak uste du autoritate gutxi edo inongo autoritaterik ez duela ikasle horiengan.

Eta gurean?

Inguruan ditudan irakasleei galdetuta, ez dirudi Euskal Herriko ikasgeletan, oro har eta salbuespenak salbuespen, egoera hain gaitza denik, baina biolentzia sotil eta intentsitate baxuko hori ez omen da ezohikoa; eta errespetu falta eta irainak ezin dira normaltzat hartu. Harreman osasuntsuak lantzea eta lortzea ezinbestekoa da, giro egokian aurrera egin ahal izateko. Hori bai, murrizketak eta baliabide falta (irakasle gutxiago izatea, gela bakoitzeko ikasle gehiago, curriculum gero eta potoloagoak…) ez dira oso lagungarri.