Ama txarra dela esanez etengabe epaitzen dutenei barre egin die emakume honek

Atalak: Amatasuna, Haurren haziera

Kirolaz mintzatzen da sare sozialetan (entrenatzaile pertsonala da), baina uzten dizkioten komentario askok ama bezala epaitzen dute: ama txarra dela haurdun zegoenean entrenatzeagatik, abdominalak izateagatik, seme-alabekin batera lo egiteagatik, haurrak nahikoa ez estaltzeagatik… Zerrenda luzea da eta testuz lagundutako argazki bat eskaini die kritika horiei guztiei; ardoa edaten ageri da bertan, alaba txokolatea jaten eta semea tabletarekin.

“Denok gaude lasterketa berean, ahal dugun ongien egiten dugu”

“Ama txarra naizela esan didaten aldi bakoitzarengatik xentimo bat emango balidate, haaaain aberatsa nintzateke –dio Sia Cooper-ek bere kontuan–. Gaur egun ia ezinezkoa dirudi ama politikoki zuzena izatea, uneoro duzulako beste bat zu epaitzen. Ama izatea nahikoa gogorra da berez; ez dago ama edo aita izateko bide zuzenik, denok gaude lasterketa berean eta ahal dugun ongien egiten dugu. Amatasuna ez da berdina denentzat eta familia bati balio dionak ez dio beste bati balio, beraz zeinek epaitu ditzake ama baten erabakiak?”.

Sare sozialean jartzen dituen argazkietan oinarrituz, ama txarra dela leporatu diote argudiatuz, besteak beste, tatuajeak eta piercingak izatea, bere itxura zaintzea, umeei noizbehinka azukrea eta janari zaborra jaten uztea, seme-alabei teknologia erabiltzen uztea, ardoa noizbehinka edatea, beretzako denbora hartzea eta umeak izanda kirola egitea…

“Ama txar” guztiei dedikatu die argazkia.

Gaiaz gehiago:

Bateko eta besteko kritikek itotako amak