“5 urteko alabari ez diot bikiniaren goiko zatia erosi nahi”

Atalak: Generoa, Gorputza, Haurrak, Sexua

5 urteko alabentzat bainujantzia erostera joan da Laura Pinyol, baina apenas aurkitu duen azpiko galtza bakarrik duen jantzirik, ia denak doaz bularretakoaz lagunduta. “Neskatoei bikinia erostea da onartuta daukagun hipersexualizaziorik inuzente eta ohikoena”.

4-6 urteko neskentzako bainujantzietan, Terrassa hiriko Decathlon dendan Pinyolek ikusi dituen 21 jantzietatik 2 baino ez dira soilik azpiko galtza, Zaran 36tik 8, Calzedonian 31tik 10, Bóbolin 24tik 3, eta Okaïdïn 10etik 2. Eta 4-6 adinaz ari gara; 10 urteko nesken arropara bagoaz, azpiko galtza soilik erosteko aukera oso-oso txikia dela dio.

Ezetz esatearen balioa, txikitatik

Denda gehienetan erantzun berdina jaso du: “Gustuko duzun bainujantzia erosi eta gero ez erabili goiko zatia”. Baina berak ez du halakorik nahi, ez die behar funsgabe bat sortu nahi bere 5 urteko alabei, ez die transmititu nahi goiko zatia eramatea dela normalena. “Naturalizatuta dugun horri ezetz esan ahal izatea” aldarrikatu du artikulu batean, “halakoei ezetz esatearen balioa erakutsiz baino ez dutelako barneratuko etorkizunean ez ezetz dela, leloak dioen moduan”.

Sexualitate heldua, umeei inposatua

Sexualitatearen garapen naturalaren aurrean, sexualizazioak ikuspegi instrumentala ematen dio pertsonari, objektu sexual bihurtzen du, eta umeei konbentzio batzuen araberako sexualitate heldu bat inposatzen die, zeinetarako ez dauden prestatuta ez emozionalki, ez psikologikoki, ez fisikoki. Uste baino normalizatuagoa dugu umeen sexualizazioa, eta hala kontatu genuen Txikitatik panpina sexy bihurtzea amets erreportajean.