5 urteetatik hasita, sexu heziketa derrigorrezko ikasgaia izango da Quebeceko eskoletan

Atalak: Gorputza, Haurrak, Hezkuntza, Sexua

Hastear den ikasturte honetan, derrigorrezko ikasgai berria emango dute Quebeceko ikastetxe publiko nahiz pribatu guztiek: sexu heziketa. Lore eta erleen metaforarik gabe, ugalketa prozesuaz zintzo hitz egingo diete 5 urteko haurrei, baita familia eredu anitzez edota bulba eta eskroto hitzen esanahiaz ere. Ikasgaiak jarraipena izango du derrigorrezko hezkuntzan, 16 urtera arte.

6-7 urterekin, adibidez, genero estereotipoez eta sexu erasoez hitz egingo dute ikasgelan; 8-9 urterekin, pornografiaz; ondoren, Interneten pedofiloek darabiltzaten estrategiez, gorputzean esperimentatutako aldaketez, irudiaz, erakarpenaz, sexu joerez, sexu harremanetan onarpena emateaz…

Masturbazioaz ezin da hitz egin

Gaur egun, sexu heziketa hautazko ikasgaia da Kanadako Quebec probintzian, eta 200 bat ikastetxek eskaintzen dute. Hemendik aurrera, Quebecen dauden 3.114 ikastetxeetan emango dute, lehenengo urtetik (Kanadan 5 urterekin hasten dira haurrak eskolan). Antzeko curriculuma dute 2015etik Kanadako Alberta, Ontario eta Columbia Britainiarrean, baina Ontarion gobernua kontserbadoreek lortu ostean, 2015eko curriculuma atzera bota eta 1998kora itzuliko direla iragarri dute. Ez dute ongi ikusten 2015eko curriculumak sexu berekoen arteko ezkontzez, genero berdintasunaz edota masturbazioaz irakastea.

“Sexuaz mezu ezkorra helarazten zaie haur eta gazteei”

Euskal Herrian, eskasa da eskolak oro har sexuari eskaintzen dion lekua. Eskoletan ilunpean dagoen ikasgaia erreportajean azaldu bezala, ordu kopuru urriak maiz urgentziazko gaietara mugatu ohi du sexu heziketa, eduki asko alde batera utziz. Sexologoak artikuluan dioenez, “gaixotasunen nahiz tratu txarren prebentzioan edo praktika sexualetan oinarritzen dira edukiak. Sexuaren inguruko mezu ezkorra helarazten zaie haur eta gazteei: arriskutsua dela, kontuz ibili behar dutela…”.