“Capharnaüm”. Miseriara kondenatuta

Atalak: Zinemaldia 2018

Zertarako ekarri ume bat mundura, miseriara kondenatuko baduzu, jaiotzen den unetik tratu txarrak emango eta bizimoduz aldatzeko aukerak lapurtuko badizkiozu? Hala pentsatzen du Capharnaüm filmeko protagonistak, 12 urte inguruko mutikoak (ez berak ez gurasoek ez dakite zehazki zenbat urte dituen) eta horregatik jarri die salaketa gurasoei auzitegian. Gogorra da ezer ez daukanaren bizitza Libanon.

Nadine Labaki zuzendariak (Caramel) Libanoko kaleetan bizirauten saiatzen den Zain mutikoaren istorioa dakarkigu oraingoan. Pobreziaren pornografia egitea leporatu dio kritikariren batek, baina pobrezia bere gordinean ikusaraztea eta erretratatzea askoren errealitatea islatzea baino ez da, eta gainera, gordina eta garratza izanagatik, deskriptibotik gehiago du filmak, emozionaletik baino. Jatekorik eta paperik ez izatea zer den erakusten digu filmak, eta batez ere, egoera horren aurrean jokatzeko dauden modu ezberdinak, duintasuna, ardura, maitasuna, laguntza… jokoan.

Gurasoak epailearen aurrera eramaten ditu protagonistak, mundu honetara ekarri dutelako, eta egia da abiapuntua ez dela sinesgarria, baina aitzakia da, batetik gogoetarako (gizarteak eta sistemak egin ditu gurasoak bihozgabe, ala pobre izanda ere bestela jokatu daiteke?…), bestetik Zainen istorioa ezagutzeko; azkarra, leiala eta bizitzak gogorturiko mutikoaren istorioa, dagokiona baino lehenago haurtzaroa utzi behar izan duen umearena. Ongi kontatutako istorioa da gainera, bortitza eta krudela, hainbat eta hainbaten bizitza bezalaxe.

Azpimarratzekoa da Zain txikiaren aktore lana, primeran baitarama pelikularen pisu guztia. Canneseko jaialdian, Epaimahaiaren Saria irabazi du aurten Nadine Labakiren filmak.

PERLAK

Capharnaüm

Zuzendaria: Nadine Labaki.

Gidoilariak: Nadine Labaki, Jihad Hojeily, Michelle Kesrouani.

Aktoreak: Zain Al Rafeea, Yordanos Shiferaw, Boluwatife Treasure Bankole, Kawthar Al Haddad, Fadi Kamel Youssef, Cedra Izam.

Libano, 120 minutu.