Legebiltzarrean ez da hil eskola-segregazioaren eztabaida. Orain zer?

Atalak: Diskriminazioa, Hezkuntza

Eskola-segregazioa gainditzeko herritarrek aurkezturiko lege-proposamena Eusko Legebiltzarrean eztabaidatzeari ateak itxi dizkiote EAJ, PSE eta PPk, baina oraindik soka luzea ekarriko du gaiak. Plataforma herritarrak presio egiten jarraitzeko asmoa du, Ikastolen Elkarteak udazkenean aurkeztuko du bere proposamena gaiaren inguruan, eta ikusteko dago Jaurlaritzak aurrera atera nahi duen hezkuntza legean nola jorratuko duen eskola-segregazioa.

Legebiltzarrean herri-ekimen legegilea atzera botatzen zuten bitartean, elkarretaratzea egin zuten eraikin kanpoan (argazkia: Rebeka Ubera)

17.000 sinadurak babestuta, zortzi neurriko proposamena aurkeztu dute herritarrek, eta Legebiltzarrak atzera bota arren, argi esan dute: ez dute eztabaida luzatzerik eta atzeratzerik nahi, behar bereziak dituzten ikasleak kontzentratzen dituzten ghetto-ikastetxeak errealitate diren honetan. Legebiltzarreko agerraldiaren balorazioa egin, eta gaia lehen planoan mantentzeko lanean segituko dute. Gainera, oraindik aurreratu ezin den egitasmorik ere ezagutuko dugu laster. Besteak beste, herri plataformak aldarrikatzen du matrikulazio bulego edo leihatila bakarra –sindikatu eta familien ordezkariak barne hartuko dituena–, matrikulazioa zentralizatu eta irizpide ekitatiboak ziurtatzea errazagoa izan dadin.

“Ikastolok ez diogu eztabaidari inongo beldurrik”

Koldo Tellitu Ikastolen Elkarteko lehendakariak adierazi digunez, Legebiltzarrera eraman den herri ekimen legegilea alderdien artean bakarrik ez, hezkuntza eragileen artean ere eztabaidatu behar da eta “hezkuntza eragileek gai honetan ditugun planteamenduak ez daude niri iritziz hain urrun. Egin dezagun. Ikastolok ez diogu eztabaidari inongo beldurrik eremu honetan, aitzitik, bultzatu nahi dugu eta horretarako laster aurkeztuko dugu gure proposamena”. Hain juxtu, udazken honetan egingo dute proposamen propioa ikastolek: besteak beste, behin ikasturtea hasita berandu matrikulatzen diren ikasleetan jarri nahi dute arreta, ikusten baitute eskolatze batzordeek zuzenean ikasle horiek eskola publikora bideratzen dituztela, eta eskola batzordeetan egon daitekeela gakoa.

Eta zer dio Jaurlaritzak?

Herri ekimena tramitatzearen kontra agertu da Jaurlaritza, argudiatuz prestatzen ari den EAErako hezkuntza legean jorratuko dela gaia. Duela gutxira arte, segregazioa zegoenik ere ukatu egiten zuen Jaurlaritzak (ikastetxeek auzoaren errealitatea islatzen zutela zioen Cristina Uriarte Hezkuntza sailburuak), eta ez dirudi administrazioak epe labur-ertainerako soluziorik duenik. Izan ere, soluzioa hezkuntza legea baldin bada, oso geldo egosten ari dira lege hori (Heziberri famatuaren azken fasea), oraindik aurreproiekturik ere ez dago eta luze jo dezake prozesuak. Are gehiago jakinik lege horrek eskola publikoko ordezkariak kontra dituela eta hezkuntza eragileen artean ez dagoela adostasunik legeko hainbat punturen inguruan.