Polizia lana egiten duen alkatea

Atalak: Diskriminazioa, Migrazioa

Dirudienez, polizia lana da alkateari dagokion lana, bai behintzat Ribaforadan. Legea eta poliziaren eskakizuna bete baino ez duela egin dio bertako alkate Jesús Mari Rodríguezek (PSN). Modu bitxian egin du, hori bai: herrian hamar urte bizitzen zeraman jatorri senegaldarreko bizilagunari eskatu zion udaletxera gerturatzeko, erroldari buruzko bilera batera. Amarrua zen. Espainiako polizia zuen han zain eta 24 orduko epean hegazkinean sartu zuten Afrikara bueltan.

Alkatea irudikatu dezaket poliziak jomugan dituen herritarrei deitzen, aitzakiaren batekin udaletxera joan daitezela esanez. Kontuz, beraz, Jesús Mari Rodríguezek zurekin hitz egin nahi duela-eta udaletxera gonbidatzen bazaitu… Edo beharbada, profil jakineko bizilagunekin baino ez ditu halakoak egiten. Izan ere, gauza bat da legea bete behar izatea eta bestea legea tresna gisa baliatzea norbere asmoak aurrera ateratzeko. Gainera, herritarrak engainatzea ez al da legea urratzea? Etikoki behintzat bada arbuiatzeko modukoa eta jokabide etikoa ere badagokio alkate bati.

Nafar senegaldarrak hainbat delitu egiteagatik aurrekari penalak zituela eta horregatik kanporatze agindua zuela azpimarratu du alkateak. Ez dakit zein delitu egin dituen Ribaforadako bizilagunak, baina badakit zein erraz hartzen diren kanporatzeko erabakiak eta zein erraz ezartzen zaizkien aurrekari penalak migratzaileei gurean, nahikoa da isun bat euren etorkizuna orbantzeko.

Udal hauteskundeak gainean ditugun honetan, komeni da gogoratzea egoera zaurgarrienean dauden herrikideak babestea ere badela udal gobernuaren zeregina. VOXek milaka migratzaile Espainiako Estatutik bota nahi dituela esan eta asaldatu egiten gara, baina kanporatzeak gauzatzeko alfonbra gorria jartzen dutenak beste batzuk dira, eta ez dago ardi larruz mozorroturiko otsoa baino arriskutsuagorik. Hori ere gogoan hartu beharko genuke hurrengo udal hauteskundeetan.