Umerik onartzen ez duen hotela iritsi da Donostiara

Atalak: Diskriminazioa, Haurrak

Apirilaren 1ean zabalduko ditu ateak Villa Favorita hotelak. Kontxa pasealekuan dago eta helduak baino ez ditu onartzen. Zergatik ez duten haurrik nahi? “Lasaitasuna, erosotasuna, erlaxazioa eta ingurune bare bat preziatzen duten pertsonentzat” delako hotela, webgunean argudiatu dutenez.

Kasuaren arabera, 16-17 urteko gazteak ere sartu ahalko dira, beti ere helduren batek lagunduta, baina 12-13 urtetik beherako umerik ez. Hala zehaztu dute El Diario Vasco egunkarian. Antza, hori da modua bermatzeko ez dela zarata desatseginik izango eta ondokoak ez zaituela gogaituko edota deseroso sentiaraziko.

Umefobia eta diskriminazioa

Gero eta ohikoago bihurtzen ari dira umerik onartzen ez dituzten espazioak, baina lasai egoteko aitzakian haurrei sarrera galaraztea nahiko soluzio tristea dirudi. Ezin da edozein lekutan edozer egin, ados; guraso batzuek arduratsuago jokatu beharko lukete seme-alabekin, ados; baina umeak ume dira, eta sarri zeinen enpatia eta tolerantzia gutxi dagoen helduen artean, bizilagunaren umeekiko. Garbi dute batzuek: umefobia eta diskriminazioa dago halako erabakien atzean, arrazagatik edo sexu-joeragatik norbaiti sarrera debekatzearen pare.

Eta gakoa, beste hainbatetan esan dugun gisan, elkarbizitza da. Gora espazio anitzak, espazio bizi eta aberasgarrienak direlako.