Eskola kirolari ostikoa

Atalak: Haurrak, Hezkuntza, Jolasa, Kirola, Koronabirusa

Asteburuetan kirol norgehiagokak egin daitezke EAEn… kirol-klub edo federazio bateko kide bazara, gimnasioa edo kiroldegia ordaintzen baduzu, edota profesionala bazara (harmailak ikusle andanez beteta). Eskola kirola egiten baduzu, ordea, ez dago baimenduta. Berriro ere egin du Jaurlaritzak.

“Ez dela hainbesterako” diote batzuek, eskola kiroleko entrenamenduak mantendu direla eta asteburuetako norgehiagokak baino ez dituztela bertan behera utzi –sarri haurrengan ilusio berezia pizten duten horiek, kontziente eta inkontzienteki hainbat irakaspen dituzten horiek–. Kontua, baina, sakoneko diskriminazioa da: batetik, publiko eta pribatuaren artean, pribatuaren mesedetan: haurren udalekuekin berdin jokatu zuten, publikoak itxi zituzten eta pribatuak mantendu, covidak diruz ordaindutako ekintzetan kutsatuko ez balu bezala. Bestetik, pareko ekintzekin ez delako berdin jokatu: bi haur talde elkartzen dituen kirol norgehiagoka ez da baimenduko, baina jende kopuru hori edo handiagoa biltzen duten ekintzei ez zaie eragozpenik jarriko? Zein da irizpidea?

Beste behin haurrak jomugan jarri direla salatu du hainbatek. Gazteen eta parranden kriminalizazioa nabarmena izan da pandemia honetan, baina haurrak subjektu kutsatzaile arriskutsu gisa aurkezteko joera ere ez da atzean geratu, haien arteko elkarrekintzak mugatzeko eta baita debekatzeko ere ahaleginak lekuko. Hori bai, umeak “heroien pare ari direla” dioen diskurtsoa beti datorkie ongi agintariei, umeei zuzendutako neurriak zorrozteko.