“Mugikor tentelen” demanda hazi da, deskonexioa helburu

Atalak: Hezkuntza, Teknologia berriak

Internetik, Whatsappik, sare sozialik gabeko mugikorrengatik aldatu du smartphonea gazteen %12,2k, Espainiako Estatuan. Funtzio oinarrizkoak baino ez dituzten mugikorrak erosteko bilaketak %215 hazi dira urtebetean. Desazkunde (eta desintoxikazio) digitalaren aldeko mugimendua handitzen ari ote da?

“Teknologiarekin beti da hobeto” mantrarekiko gero eta ahots kritiko gehiago entzuten da. Arg: Insurgencia Magisterial

Bitxia da, Internetik gabeko aroa ezagutu ez duten gazteak dira batez ere beren mugikorretan deskonexio digitala bilatzen dutenak. Hala dio SPC konpainia teknologikoaren txostenak. Mugikor adimentsuekiko menpekotasuna murriztu eta denboraren kontrola berreskuratze aldera, deskonexio digitala joera bilakatzen ari da telefono eramangarrietan, dio txostenak; hori bai, gutxiengoa dira oraindik dumbphone (mugikor tentelak) deiturikoak dituztenak (%12-20 artean). Deitu eta deiak jasotzeko, musika entzuteko, argazkiak ateratzeko… balio duen mugikorra nahi dute, ez besterik. Pista bat: prezioak konparatzeko erabiltzen den Idealo webgunean, 2023ko irailetik 2024ko irailera %215 hazi da mugikor tentelak bilatzen dituztenen kopurua, Espainiako Estatuan.

Eskolan teknologiarik gabeko espazioak izatearen garrantzia azpimarratu dute teknologian aditu direnek eurek

“Teknologiarekin (eta zenbat eta teknologia gehiagorekin) beti da hobeto” mantrarekiko gero eta ahots kritiko gehiago entzuten da; sarri, haurtzaroari eta hezkuntzari lotuta dator mezua, dela lehen mugikorra izateko adina atzeratzeko beharra, dela pornografiarekiko eta sare sozialekiko kezka, eskolaren digitalizazioa birpentsatzeko aldarrikapena… Ez alferrik, smartphone eta sare sozialek buru osasunean, antsietatean, menpekotasun emozionalean… izan ditzaketen eragin kaltegarriak bereziki haur eta nerabeen artean islatzen direla diote azterketek. Chromebookez betetako ikasgelak panazea gisa saldu zizkiguten, baina prozesu analogikoak ez alboratzeko premia eta eskolan teknologiarik gabeko espazioak izatearen garrantzia azpimarratu dute, zer eta teknologian aditu direnek eurek (irakurri Teknologiarekiko lilurak ez dezala hezkuntza itsutu artikulua).

Eta nire buruari galdetzen diot: pixkanaka ba ote dator biraketa bat desazkunde digitalari bide emango diona, eta ez soilik hezkuntzan, gure eguneroko arlo guztiak harrapatuko dituen gogoeta sakonago baten baitan baizik, arrapaladan datorkigun inbasio teknologikoarekin saturatuta dauden herritarren partetik? Besterik ez bada, erritmo hau sostengaezina delako, ikuspegi askotatik.