Segurtasun nuklearra ez da segurua

Atalak: Energia, Uncategorized

Garoñako zentrala.

Ezetz, Europak ez dituela inondik inora Japoniaren arrisku sismikoak eta ondorioz ezin dela halakorik errepikatu hemen: indartsu ari dira lobby nuklearrak mezua zabaltzen. Baina segurtasun neurrietan herrialde aurreratuenetakoa da Japonia, eta han ere ezinezkoa omen zen zentral nuklearretan ihes erradioaktiborik izatea, dena kontrolpean ei zegoen. Energia nuklearraren aldekoek segurtasuna zuten berme nagusi beraien diskurtsoetan. Eta orain zer?

Bada, orain, ikusi beharko da pronuklearrek zein estrategia jarraitzen duten herritarren artean piztu den alarma justifikatuari aurre egiteko. Oraingoz entzun dugunagatik, beroan ez omen da eztabaidatzeko unea, eta Txernobilgo mailara ez omen da iritsiko hondamendia –horrek lasaitu beharko gintuzke?–. Eta eztabaidatzeko unea ez denez, gobernuen luzapenak jasotzen dituzten zentral zaharkituek funtzionatzen jarraitzen dute. Ondo-ondoan dugu guk Espainiako Estatuko zaharrena: Garoña. Arabatik 5 kilometrora, 1970ean eraiki zuten, 25 urterako, eta duen segurtasunaren inguruko kezkak sarri izan dira hizpide. Nuclenorrek dio mantentze-lanei esker gero eta seguruagoa dela. Alberto Frías Garoñarik Gabeko Araba talde ekologistako bozeramailearen iritziz, ordea, ezinezkoa da lehenengo belaunaldiko zentrala azken belaunaldiko bihurtzea: “Erreaktorearen ontzia eta ingurua ezin da aldatu eta funtsezkoena hori da; Seiscientosa hartu eta karrozeria soilik aldatuz BMW bat lortzen saiatzea bezala da”.

2008an egin nion elkarrizketan, zera zioen Friasek: “Arazo estrukturala da Garoñarena; ezin izan du konpondu duen korrosio intergranularra (Zorita ixteko eman zuten arrazoia hain zuzen, eta ia-ia berdina da Garoñaren arazoa). Gauza asko konpondu ezinak dira mantentze lanak eginda ere. Hasieran esan zuten 25 urterako zentrala zela, gero 40 urterako zela, eta orain 60rako? Erruleta errusiarra da hau. Garoñak azken 40 urteetan izan dituen akatsen txostena azaleratu genuen eta akats gehiegi dira irekita jarrai dezan, geroz eta akats gehiago dira gainera, onartezinak”.

PSOEk zentral nuklearrak ixten joateko hasieran hartu zuen konpromisoa ahaztua du aspaldi eta luzapena berritu zion Garoñari. Ikusteko dago Japoniako gertaerak herritarren presioa handituko duen eta politikoki zentralaren iraupenari eragingo dion.