Tragediaren argazkia garaile

Atalak: Argazkia

Argazki saritua.

Paul Hansen argazkilari suediarraren ondoko argazkiak irabazi du aurtengo Swedish Picture of the Year Awards saria. Iaz Haitin lurrikararen ostean ateratako argazkia da; irudian ageri den 15 urteko neskatoa poliziak hil zuen, eskuan dituen objektuak lapurtzeagatik. Imajinak polemika piztu du Interneten: zergatik saritzen dituzte beti ezbeharrak? Etikoa al da sariak irabazteko besteen sufrimendua baliatzea?

Egia esan, hondamendiak, ezbeharrak eta bidegabekeriak kontatzea eta irudikatzea da kazetarion eta kazetaritza-argazkilarien lana. Arazoa da analisi informatiboaren eta morborako joeraren arteko muga lausoa dela zenbaitetan. Modu ez-ohikoan hil diren biktimen kasuan adibidez, ondo al dago hedabideetan, familiaren baimena izan gabe, gorpua erakustea? Testuinguru batzuetan, gertuko egiten zaizkigunetan batez ere, oso zaila izango duzu pertsona baten gorpua medioetan ikustea; aldiz, beste testuinguru batzuetan, errazkeria handiz jartzen dituzte lehen planoan.

Tragedia ikusaraztea beharrezkoa da, arazo horien kontzientzia hartzeko eta munduaren alde gordinena agertzeko. Ordea, irudi bortitzez anestesiatuta gauden honetan, zenbatetan da helburua kritika egitea, eta zenbatetan bihurtzen dira gorpuak merkantzia hutsa, irudiak saltzeko eta irakurleen arreta bereganatzeko?

Kontuak kontu, Nathan Weber lankideak ateratako argazkia (behean), neskato hilak argazkilari saldoa inguruan duela, zer pentsatua ematen du.

Argazkiaren "making off"a

Hainbat unetan kazetari-argazkilariak jokatu beharko lukeen rolari buruzko posta: “One Hundredth of a Second”. Argazkilaria, lekuko ala laguntzaile?