Marionekin maiteminduta

Atalak: Uncategorized

Marion Cotillard (Adriana) eta Owen Wilson (Gil), 'Midnight in Paris' filmean.

Coco Chanelekin moda ikastera Parisa joan, eta Modigliani, Hemingway eta Picassoren musa eta maitale bukatu duen emakume bitxia da Adriana. Berarekin maiteminduko da 1920ko hamarkadako Parisera gauero bidaiatzen duen idazle protagonista, eta ez gaitu harritu. Woody Allenen azken filmean Marion Cotillard aktore frantziarrak antzezten duen emakume misteriotsu eta liluragarriak planoak ostu dizkie inguruko guztiei.

Édith Piaf abeslari frantziarraren bizitza antzeztuz, 2007an Oscarra irabazi zuen Marion Cotillardek, La Vie en Rose filmagatik. Hainbat estatubatuarrek saria kentzeko eskatu zuen ondoren, elkarrizketa batean zalantzan jarri zuelako irailaren 11ko gertaeren bertsio ofiziala. Konspirazioaren teoriekiko joera duela adierazi zuen, dorre bikien aurkako atentatua zalantzan jartzerakoan, eta adibide bezala zioen inoiz ez dela ikusi eraikin bat eraitsi egin denik su hartu duelako. Polemikak polemika, emakume argia da Cotillard, begirada, keinu, ahots eta gorputzeko adierazkortasunarekin dena esateko gai den antzezlea. Bera da benetako protagonista Midnight in Paris Woody Allenen azken lanean; Pariseko farolen argipean eta kafetegietako iluntasunean, ikuslearen arreta bereganatzen du.

Bestela ere gozatu dut zuzendari estatubatuarraren istorio surrealistarekin. Ohiko moduan, hemen hitzez azaltzeko istorio konplexuegia da, baina gustura ikusten da garai bateko artistak, elkarrizketa burutsuak, pasadizo xelebreak eta antzezpen egokiak biltzen dituen Allenen enegarren maitasunezko drama komikoa edo komedia dramatikoa. Woodyalleniarra, ezinbestean.

Midnight in Paris
Zuzendaria eta gidoilaria: Woody Allen.
Aktoreak: Owen Wilson, Rachel McAdams, Marion Cotillard.
100 minutu. AEB, 2011.