Indiana Jones iruzurraren bila

Atalak: Zinema

Filmeko irudia.

Indiana Jones and the Kingdom of the Crystal Skull (Indiana Jones eta Kristalezko Burezurraren Erreinua) filma gaur estreinatuko da mundu osoko zine aretoetan. Oraingo honetan, Azteken Inperioaren garaiko burezurraren bila abiatuko da arkeologo ausarta, Akatonen kristalezko burezurraren bila alegia. Erlikia hori gaur egun British Museumen dago ikusgai, baina bere webgunean aditzera ematen duenez, faltsifikazioa dela frogatu dute hainbat adituk.

Akatonen burezurra kultura azteka eta maiarekin lotura duten hamahiru burezurretako bat da: kondairaren arabera, Itza izeneko pertsonaiek Atlantidatik eramandakoak dira burezur horiek eta jakinduria daramate bertan. Mitoak dio hamahiru burezurrak elkartzerakoan mundua gelditu egingo dela. Momentuz, hiru baino ez dituzte aurkitu eta gaur egun Pariseko, Londreseko eta Washingtongo museoetan daude gorderik. 11 zentimetro eta 2,5 kiloko burezur hauek, baina, iruzurra direla frogatu dute British Museumeko eta Washingtongo Smithsonian Institutuko ikertzaileek.

Analisiaren arabera, XIX. mendean egindako faltsifikazioak dira, 1867 eta 1886 urteen artean burutuak. Izan ere, kristala leundu egin zieten eta ezinezkoa da teknika hori azteken garaian erabili izana. Hipotesietako baten arabera, iruzurra Alphonse Pinard arkeologoak egin zuen beharbada, 1875ean, espedizio berri bati ekin ahal izateko diru beharrak bultzatuta.

Hortaz, XIX. mendeko bigarren zatian bildumagile publiko eta pribatuen artean hainbesteko miresmena eta interesa erakarri zuten erlikia hauek faltsuak dira. Halere, gertakari honek ziur ez duela Indiana Jonesen azken filmeko miresmena eta interesa itzaliko. Azken finean, errealitatearen eta kondairaren arteko mugetan dauden objektuekin jolastu izan dute beti Indiana Jonesen filmek. Lehenengo pelikulan bilatzen zuen arka famatua (Bibliak aipatzen duena) Etiopian dagoela diote batzuek, Jordanian ezkutatuta mantentzen dutela dio beste hainbatek. Beste abentura batean bilatu zuen Grial Santuaren inguruan berriz, teoria asko dago bere kokalekuaz edo esanahiaz. Urrutira joan gabe, jatorrizko Grial Santua beraiek dutela dio Valentziako katedralak.