Lagun ez hain minak

Atalak: Zinema

"Lagun mina" film laburraren kartela eta fotograma.

“Noizbait Euskal Herrira bazoaz, aterpea duzu nire etxean”, esango dio Ekaitzek oporretako bidaia batean ezagutu berri duen Roman kolonbiarrari. Itsumustuan eta asko pentsatu gabe esaten diren esamolde horietakoa da, baina batzuek hitzez hitz sinesten dituzte halakoak, edo sinetsi egin nahi dituzte. Azken finean, gure behar eta nahietara egokitu ohi dugu errealitatea, eta bakarrik dagoenak laguna nahi du. Errealitatea, ordea, ez da beti gure behar eta nahietara egokitzen, eta lagun berria duela uste duena kolpera konturatu daiteke bakarrik jarraitzen duela.

Aitor Arregirekin Lucio anarkista nafarraren dokumentala eta Jon Garañorekin 80 egunean pelikula zuzendu dituen Jose Mari Goenagak edozein istorioren oinarrian dagoen gaiari heldu dio, pertsonen arteko harremanei, Lagun mina film laburrean. Harremanak ezberdin bizi ditu bakoitzak, baita errealitatea bera ere, eta horretaz ohartzea beti ez da samurra; horregatik, umoretsu kontaturiko istorioak kutsu dramatikoa hartuko du amaieran. Fikziozko dokumentalarekin jolasean, eta erritmoa uneoro mantenduz, Goenagak dotoreziaz gidatu du lana. Gomendagarria, beraz, Kimuak ekimenaren baitan herriz herri proiektatzen ari diren film hau.

Argitu dezagun, bide batez, Lander Camarero bilbotarraren What about Columbus izeneko dokumentalerako jaio zela Lagun mina. Camarerok proposamen originala egin du What about Columbus-en: India, Peru eta Euskal Herrian, herrialde bakoitzeko zuzendari eta gidoilari bat hautatu, eta Antoine Saint-Exuperyren Printze txikia ipuin famatuan inspiratuta 10 minutuko film bana egitea eskatu die. Guztira hiru film labur jaso ditu beraz dokumentalean, Euskal Herriaren kasuan Jose Mari Goenagak eta Aitor Arregik egindako Lagun mina, lengoaia narratiboen inguruan gogoetatzeko asmoz. Horrez gain, zuzendari-gidoilariek, bakoitzak bere kultura eta idiosinkrasia nabarmenduz, hausnarketa interesgarriak plazaratzen dituzte lanean. Alabaina, Lander Camarerok hiru laburren artean tartekatzen duen istorio surrealista eta xelebrea, bere burua protagonistatzat duena, nekagarria egin zait azkenerako.

Ikusi trailerra:

Lagun mina
Zuzendaria: Jose Mari Goenaga
Gidoilaria: Aitor Arregi
Aktoreak: Eriz Alberdi, Diego Santos
Moriarti Produkzioak
13 min. Euskal Herria, 2011