Batzuetan beranduegi da barkamena eskatzeko

Atalak: Zinema, Zinemaldia 2012

Filmeko protagonistetako bat.

Bizikidetza eta elkarbizitza. Mina gainditu, aurkaria izandakoa barkatu eta aurrera egin. Zeinen erraza dirudien teorian; gertukoa eta ezaguna zaigu gaia, gainera. Baina errealitatea inoiz ez da arrosa kolorekoa, eta horregatik, erdipurdiko terapeutak Meyyar Al Roumiri esaten dionean aurrera egin behar duela, desagertua duen semeak utzitako mina albo batera utzi eta bere burua onartu behar duela, altxatu eta joan egingo da Al Roumi. Sakonak dira Libanoko gerra zibilak eragindako zauriak, eta beldurrik gabe azaleratu ditu Labyali bala noom (Sleepless Nights) filmak.

Gerra zibilean Libanoko Segurtasun Indarretako goi kargu izandakoak zorrotz kontatzen du odolez zikinduak dituela eskuak eta torturak agindu zituela, gorpuekin zer egin erabakitzen zuela, musulmanenganako gorrotoa txikitatik irakatsi ziotela, eredutzat zuten Israelek lagundu ziela… Kazetariak aurrez aurre jarriko ditu berau eta gerran adin txikiko seme komunista galdu zuen ama. Baina umel jarraitzen dute zauriek, eta ez daude prest elkarri inolako besarkada faltsurik emateko. Alderdi Komunista ere xaxatuko du kazetariak, besteak beste adin txikikoak erreklutatu zituelako. “Gerra zen, eta gerran normala da”. Horixe da Raheben dokumentalak jasotzen duen erantzun ohikoena. Testigantzek, bere gordinean, berreraikitzen dute jazotakoa, zintzo, garden, jakinik gerra inoiz ez dela zintzoa eta gardena.

Dudarik gabe, testigantzak dira pelikularen altxorrik baliotsuena. Artifiziorik gabe, batzuek eta besteek kontatutakoa biltzen doa dokumentala, eta lekukoen beraien hitzek harilkatzen dute historia, garrazki. Egunero ez dugulako agintari bat entzuten egindako ankerkeriak hain modu irekian aitortzen. Inpunitatearen babesa izango da agian, baita erredentzio nahia ere. Baina batzuetan beranduegi da barkamena eskatzeko. Hori bai, inoiz ez da berandu gertaturikoa egiazki azaltzeko, ahanzturan galdu ez dadin. Zer pentsatua ematen du, batzuek gurean hainbat ahots isilarazi eta aldebakarreko historia kontatu nahi duten garaiotan, errelatoa eraikitzerako orduan.

ZUZENDARI BERRIAK SAILA

Layali bala noom / Sleepless Nights

Zuzendaria: Eliane Raheb

Gidoilaria: Nizar Hassan

Protagonistak: Jocelyne Abi Gebrayel, Meyyar Al Roumi

Libano-Dubai. 128 minutu.