Kaosaren harmonia lirikoa

2007-09-02  //  Zinema  //  Iruzkinik ez

Caótica Ana, Espainia, 2007. 118 m.
Zuzendaria: Julio Medem.
Aktoreak: Manuela Vellés, Bebe, Nicolas Cazalé, Charlotte Rampling, Asier Newman, Lluís Homar.

Filmeko irudia.

Bagenekien ez zela film erraza izango, oraingoan ere Medemek subkontzientearen eta ametsen muga ezkutuetan arakatuko zuela. Gure subkontziente kolektiboari buruzko fabula feminista izango zela abisatu zigun zuzendariak, eta emozionalki harrapatuko gintuela. Horretarako, Medemi duela urte batzuk hil zitzaion arreba Anaren omenez egindako pelikulak lengoaia sinbolikoa darabil, eta protagonistaren bidaia erreala eta hipnosi saioen bidez denboran eginiko bidaia uztartzen ditu. Sexu esplizituak Lucía y el sexo ekarri digu gogora eta amodiozko istorio tragikoak berriz Los amantes del círculo polar, baina hau ez da amodio istorio bat. Ez da istorio soila, behintzat, harago baitoa: Anaren pertsonaiarekin, historian zehar gizonek emakumeei eragindako sufrimenduaren ordezkari eta sinboloa eraikitzen du filmak. Emakumeak dira benetako protagonistak, bidegabekeriei aurre egin eta bizirauteko gai direnak.

(gehiago…)

Mayo Plazako Amek 30 urte. Bideoa

2007-05-15  //  Nazioartea  //  Iruzkinik ez

Bonafiniren hitzaldian.

Argentinako Mayo Plazako Amen mugimenduak 30 urte bete ditu. 1974-1975 urteetan, herrialde hartako Alianza Anticomunista Argentina (AAA) talde armatu ultraeskuindarrak hainbat lagun ‘desagerrarazi’ zituen. Desagertzeak asko ugaldu ziren 1976an diktadura militarra inposatzearekin batera eta seme-alaba horien desagerpena salatzeko, pixkanaka Mayo Plazako Amen mugimendua jaio zen. Dagoeneko 30 urte igaro dira, baina lanean gogor jarraitzen dute: bidegabekeriak salatuz, kritika politikoa eginez eta ahal duten neurrian baliabide gutxi duen jendea lagunduz. Oraindik ere, ostegunero dago Ama multzoren bat Buenos Airesko Mayo Plazan, egiteko eta hobetzeko asko dagoela gogorarazteko. Gainera, 30 urte bete dituztela-eta, ekitaldi ugari egin berri dituzte, hala nola Vida en imágenes liburuaren aurkezpena. Ekitaldian Hebe de Bonafini Amen bozeramaileak hitz egin zuen (ARGIArako Álvaro Hilario Pérez de San Románek 2071. alean elkarrizketatua) eta liburuaren aurkezpenean esandakoaren pasarte bat bideoan jaso dugu.