Kutxabank auzian, non dago Kutxabank?

Atalak: Ekonomia

Kutxabank auziko epaiketa. Irudian Mikel Cabieces, Rafael Alcorta eta Mario Fernandez (Argazki Press / Aritz Loiola)

Kutxabankeko ordainketa bidegabeen epaiketa hasi da. Finantza entitateak kasua azaleratu eta bi urtera, akusatuen aulkian eseri dira hilean 6.000 euro jasotzen zituen Mikel Cabieces Espainiako Gobernuko ordezkari ohia, Kutxabankeko presidente zela ordainketak egiteko agindu zuen Mario Fernández bankaria, eta Rafael Alcorta abokatua.

Bizkaiko Probintzia Auzitegiko 3. Epaitegian asteartean hasi ziren Kutxabanken ordainketa bidegabeen auziko epaiketa saioak eta ostiralean amaituko dira. Cabieces Kutxabanken “kolokatzeko” agindua alderdi politikoen bidez jaso zuela onartu du Fernándezek astearteko saioan, dirudienez merezi zuen halako lanpostu bat, “terrorismoaren kontra” aritu izanagatik. Bi eta hiru urte arteko kartzela zigor eskaerari egin beharko diote aurre, fiskaltzak alde batetik eta herri akusazioak bestetik, hala eskatuta.

Baina non da akusazio partikularra? Non kaltetua? Non dago Kutxabank? Erakunde publikoetatik sortutako bankuko arduradunek aspaldi erabaki zuten akusazio gisa ez aurkeztea. Cabieces-Fernández affairean garbi geratu da Kutxabank ez zipriztintzeko eta alde batera uzteko ahaleginetan ari direla, bai erakundea bera, eta baita akusatuen defentsa ere.

Errelato baten hiru zatiak

Kutxabankek berak azaleratu zituen ordainketa irregularrak, Fernándezek bankua utzi eta Gregorio Villarreal presidente jarri zenean. Hasieran isilean mantentzen saiatu ziren, 243.000 euroak berreskuratuta bankua ez ei zelako “kalteturik” izan, baina Espainiako Bankuak “hitzez eta idatziz” derrigortu zuen euskal finantza erakundea fiskaltzara jotzera.

Ondoren, ordea, Kutxabankek jarraitu du auziarengandik ahalik eta gehien aldentzen, eta epaiketan akusatu zein lekukoak saiatzen ari dira ondoko errelatoa aurkezten:

Cabiecesi lanpostu hori emateko erabakia Fernándezek hartu zuen, ez Kutxabankek. Horregatik bankuko giza baliabideetako zuzendariorde López de Eguilazek kasualitatez “topo egin” zuen Alcortarekin, Cabiecesen martxaren berri jakiteko… Agian Fernándezen erabaki pertsonala izan zen hura, baina Kutxabankeko gainerako goi arduradunek ontzat eman eta bere egin zuten erabakia, eta bankuaren bidez gestionatu zituzten ordainketak.

Cabiecesek Alcorta abokatuarentzat egin zuen zuzenean lan, ez Kutxabankentzat. Orduan, zergatik onartzen du Cabiecesek epailearen aurrean, lapsus batean, “Kutxabankentzat” egiten zuela lana? Zergatik egiten zitzaizkion ordainketak delegatu ohiaren inizialak baino ez jarrita? Sanchez Asiain Kutxabanken zuzendari orokorrak hasieratik ziurtzat jo zuen bankua izango zela Cabiecesi ordainduko ziona. Zergatik?

Lan hori egiazkoa izan zen. “Ezinbesteko” lana egin omen zuen Cabiecesek Alcortaren buffetean, 20 urtez baino gehiagoz profesionalki abokatutzan aritu gabe egonagatik ere, eta bulegora astean bitan baino azaltzen ez zen arren. Baina zergatik Kutxabanken barne auditoriak dio egin gabeko lanengatik ordaindu zitzaiola Cabiecesi? Eta, zer demontregatik itzuli zion diru guztia Mario Fernándezek Kutxabanki?

Fernandez eta bere abokatu Carlos Bueren epaitegira iristen. (Argazki Press / Aritz Loiola)

“Kutxabankek ez du euro bakar bat erabili Cabiecesi ordaintzeko, nik aurreratu nuen dena”, azaldu du Fernándezek, presidente zenean ia 600.000 euroko dieta eta soldatei uko egin ziela gogoraraziz. Bankariaren pentsamoldea ikaragarria da, finantza erakunde publikoaren kontuak erabiltzen ditu ia bere kontu-korrontea balitz bezala. Orain utzi, orain hartu. Baina matematika erraz horiek ez dute balio kontrolerako araudiak eta legeak daudenean.

Bai, Kutxabank kaltetua izan zen, eta harekin herritar guztiak, baina non dago Kutxabank?