3 dimentsioko zinema, aretoetako iraultza berria

Atalak: Zinema

Avatar filma.

Filmak kasik estreinatu aurretik Internetetik jaisteko eta teknologia berriei esker norberak bere etxean pantaila eta soinu sistema txukuna izateko aukera dagoen garaiotan, zinemaren gainbehera nabaria da. Nola lehiatu horren aurka? Zinema estudioen apustua 3Dko pelikulak dira. Orain arte 3 dimentsioko proiekzioek sortzen zituzten arazoak gaindituta, etorkizun hurbileko iraultza izango omen da.

Sistema digital berriek grabazio estereoskopikoa delako teknika ahalbidetu dute; hots, 3Dko filmak errazago eta merkeago egiteko aukera eskaini dute. Pelikula horiek ikusteko oraindik ere betaurreko polarizatuak beharko ditugun arren, lehengo hainbat arazo saihesten ditu teknika berriak (lehen buruko mina sortzera irits zitekeen). Zinema-areto hutsei aurre egiteko bidea izan daitekeela ikusi dute estudio handiek.

Lehenengo animaziozko filmen txanda izango da, Dream Works eta Disneyren eskutik: Bolt urte bukaeran eta Monsters vs. Aliens, UP eta Toy Story 2009an. Egia esan, 2012ra arteko beste proiektu ugari lotuta dituzte bi estudio boteretsuek.

Ikusi beharko da hezur-haragizko aktoreen pelikulekin duen arrakasta. Orain arteko esperientziek ez dute harrera onegia izan (Polar Express, Beowulf), 3Dtan proiektatzeko egokituta dauden areto urrietan. Zinema-areto ahalik eta gehien egokitzea da, ordea, estudioen erronka eta dagoeneko aurreikusten da 2009an mundu osoan 5.900 areto formatu honetarako prestatuta egongo direla, horietatik %70 AEBetan.

Jendearen erreakzioa baloratzeko benetako proba 2009 amaieran iritsiko da: James Cameronek zuzendu eta Sigourney Weaver-ek antzezturiko Avatar filmak izan nahi du teknika berritzailearen lehen urrats sendoa: 200 milioi dolarreko aurrekontuarekin, 3Dko fikziozko planeta irudikatuko dute.

Dudarik gabe, publikoa erakartzeko alternatiben bila dabiltza estudioak eta hurrengo hamarkadako zinema-aretoak agian ez du zerikusi handirik izango gaur egungoarekin: usaimena erabiltzea, eserleku mugikorrak sartzea… aipatu izan da. Dirua egin nahi badu, aldaketarako garaia duela badaki zinemak.