36.000 kilometroko igogailua

Atalak: Zientzia eta teknologia

"Igogailuaren" irudia.

Ez da txantxa. Japoniarrak serio ari dira: lehenengo igogailu espaziala eraiki nahi dute. Hala argitaratu du Asahi Shimbun egunkariak. Nola? Funtsean, Lurretik 36.000 kilometrora satelite geldikor bat kokatuko dute (Lurrarekin batera bira ematen duen satelitea; hau da, beti Japoniaren “gainean” mantenduko litzateke), eta hura Lurrarekin lotzen duen kablea gaineratuko diote ondoren, aingura botata izango balu bezala.

Ezetz ba, ez dela txantxa. Kablean gora eta behera kabina presurizatuak ibiliko lirateke, igogailuen antzera, baina 12 milioi solairuko distantzia eginez. Ikerketaz arduratzen den taldeak nazioarteko konbentzioa antolatuko du laster, Tokion, beste herrialdeetako ikerlariak proiektura erakartzeko.

Eta zertarako? Dirudienez, espaziora joateko egun erabiltzen diren koheteak baino merkeagoa eta seguruagoa izango da igogailua. Kontua da beti leku berera garraiatuko lukeela bidaiaria eta bada bestelako arrazoiak ikusi dituenik: unibertsoaren konkistan, botere agerraldia egin nahi du Japonek, eta turismorako ere garraio bikaina izango omen da. Ordainduz gero, nahi adina bidaia antolatu daitezke. Agian, taberna irekiko dute satelitean. Eta beharbada, han “goitik” Lurra begiratuta, egitasmoak arrakasta badu eta beste herrialdeek kopiatzen badute, trikuaren antza izango du gure planetak.