Monty Python-darrak elkartu egingo dira berriro

Atalak: Zinema

Monty Python-en irudia.

Bai, zorionekoak gu! Zorionekoak behintzat boskote britainiar honen umore absurdo, eszentriko, surrealista eta batez ere eroa gustuko dugunok. BBC telebista katean aurrenekoz agertu zirela 40 urte bete direla-eta, dokumentala argitaratuko dute urrian, DVD formatuan, eta taldekideak berriz ere elkartu egingo dira horretarako.

Monty Python-darrak: Ia egia du izena dokumentalak. Alan Parker-ek zuzenduko du eta funtsean talde komikoaren ibilbidea errepasatuko du, kideen eskutik. Bertan agertuko dira, beraz, Eric Idle, Michael Palin, John Cleese, Terry Gilliam, Terry Jones eta Graham Chapman bera, 1989an hil bazen ere artxiboko irudiekin berreskuratuko baitute. Hainbat ospetsuk ere hartuko du parte eta Python-darren umoreak izan duen eraginaz mintzatuko dira.

Ez dakigu umore ingelesa den 1970 eta 80ko hamarkadetan talde honek egin zuena, baina umore bitxia denik ezin ukatu. Gogoangarriak Monty Python´s Life of Brian-eko judutar iraultzaile xelebreak, latinez egindako pintada, ondo ahoskatzen ez duen Pontzio Pilatos… edota Monty Python and the Holy Grail-eko besorik eta hankarik gabeko zaldun beltza, “untxi killerra ”, herriak epaitzen duen sorgina… Eta horren denaren atzean, gizarteko arlo ugariri egindako satira zorrotza. Life of Brian, adibidez, debekatu egin zuten hainbat herrialdetan, kristautasunari egindako kritika umoretsuaren ondorioz.

Dokumentala iritsi bitartean, eszena horiez guztiez disfruta daiteke taldeak berak Youtubera igo dituen bideoetan, ikusi ostean Youtubera euren filmetako zientoka irudi igotzen zituztela zaletuek.

Monty Python-en webgune ofiziala.