Man Rayren espiritu berpiztua

Atalak: Uncategorized, Zinema, Zinemaldia 2012

92 urteko printzesa errumaniarra.

Bihurgunez eta ezustekoz jositako bidaldi magikoan, bidean topatutako altxorrei lupa jarri eta istorio txikienetan edertasuna eta handitasuna bilatzen dakien dokumentala da Emak Bakia Baita. Man Ray artista dadaistak Emak Bakia 16 minutuko zinepoema egin zuen 1926an, lan esperimental eta berritzailea. Miarritze inguruko etxe batean errodatu zuen, diotenez Emak Bakia izeneko etxe batean. Arrasto horren atzetik, eraikinaren bila abiatuko da Oskar Alegria iruindarra.

Helburua baino, aitzakia da etxea, ibilbidean agertzen diren istorioetan arreta jartzeko. Tartean ageri dira, besteak beste, hiltzat jotako hila ez dagoen pailazoa; aspaldiko postal baten hartzailearen peskizan egindako espedizioa; 92 urteko printzesa errumaniarra; Ruper Ordorika hitzen heriotzaz solasean; zerri zaintzari buruzko irakaspenak; lotiak lortzeko castinga; Man Rayren hilobian aurkitutako diskoa… Mimoz eta pasioz kontatutako historia txikiak, historia handiagoaren baitan.

Batez ere, Man Rayren arima berpizten duen filma da Emak Bakia Baita. Hark egiten zuen moduan, askatasunean eta loturarik gabe egindako zinema du oinarri, umorea eta jolasa ditu bidelagun. Emaitza, surrealismo kutsua darion narrazioa, nahi estetizista nabariarekin. Tripetatik atera zaion moduan egin du pelikula iruindarrak, jarrera irekiarekin, “nire nerbio-sistema dago pelikula honetan”, eta atmosfera propioa duen paisaia bitxia lortu du, misteriotsua. “Emak bakia, bakean utzidazue” esan die mugei, eta Man Rayren espiritua eta filosofia berreskuratu ditu, eskaini ziezaiokeen omenaldirik ederrena eginez.

Filmari buruz elkarrizketa egin diogu Oskar Alegriari Argian.

Emak Bakia Baita dokumentalaren trailerra.

ZABALTEGI BEREZIAK SAILA

Emak Bakia Baita

Zuzendaria eta gidoilaria: Oskar Alegria

Euskal Herria, 83 minutu.