Aspergerra duen aita-bakarrak gizartearen aurreiritziak apurtu ditu

Atalak: Gizartea

“Normaltasun” parametroak betetzen ez dituenaren gaitasunak zalantzan jartzera ohituta dagoen gizarte honetan, lezio ederra eman du Bryan aita-bakarrak: sare sozialetan publikaturiko gutunaren bidez, munduari erakutsi nahi izan dio Asperger sindromea duen arren eta zailtasunak zailtasun, gauza dela haurra bakarrik hezteko.

Bryan eta haren alaba Faith. Hasieran, egoerak gain hartu zion aitari.

“Emozioekin eta harremanekin borrokatu naiz bizitza guztian”, onartu du Bryanek. Autismo Espektroaren Nahasmenduaren baitan, Asperger sindromea du, bizitza osorako ezaugarri neurologikoa, jarreran islatzen dena eta sozializazioa eta komunikazioa zailtzen dituena.

Faith izeneko alaba jaio eta hilabetera, orduko bikotekide eta neskatoaren ama beste gizon batekin elkartu zela eta alaba Bryanekin utzi zuela kontatu du: “Oso gogorra izan zen. Zer egin behar nuen nik? Faith nirekin bakarrik, tentel batekin. Ni nintzena eta neukan sindromea gorroto nuen!”. Gurasoek esan zioten adopzioan eman zezala alaba, baina berak heztea erabaki zuen azkenean.

“Bainugelan negarrez aritzen nintzen, lo hartu arte”

“Asperger duen pertsona batentzat, haurra heztea munduko esperientziarik zailena da, ziurrenik. Bere negarra jasanezina zitzaidan, nire arazo sentsorialek gain hartuta nengoen beti eta nire depresioak okerrera egin zuen. Ezin nuen lorik egin, ezin nuen jan. Alaba lokartu ostean, batzuetan garrasi egin eta bainugelan negarrez aritzen nintzen, lo hartu arte”.

“Dituen beldurrez hitz egiten dugu, zine-gauak antolatzen ditugu”

“Denborarekin, errazago joan da dena, egoeraren kontrola hartu nuelako eta beldurgarri izateari utzi ziolako. Umea orrazten eta janzten ikasi dut, batera goaz erosketak egitera, dituen beldurrez hitz egiten dugu, zine-gauak antolatzen ditugu…”. Bryanek lan berria dauka eta unibertsitatera itzuli da. “Alaba izugarri maite dut. Eta gauzak hobera baino ez doaz”.

Autismoaz erreportajea argitaratu genuen ARGIAn: Terapia aurrerakoi eta atzerakoienak etxe berean.