Berlingo kaleetan faxismoari aurre egiten dion 70 urteko aktibista

Atalak: Arrazakeria, Gizartea, Xenofobia

Graffitiak eta aktibismoa gazteen kontua direla? Irmela Mensah-Schramm emakume berlindarrak 70 urte ditu eta hiru hamarkada daramatza paretetako mezu homofobo, antisemita, arrazista eta naziak, gorroto mezuak oro har, ezabatzen edo mezu baikorrengatik ordezkatzen. 100.000 pegatina eta pintadari egin die aurre eta epaitegietatik pasa berri da, pareta batean spray-arekin idazten atzeman zutelako. Berak garbi du, faxismoaren kontra jarraituko du, eskuin muturra indartzen ari den garaiotan.

Joan den udaberrian, errefuxiatuen aurkako pintada bat berregiten ari zen spray-arekin, norbaitek poliziari deitu zion eta 300 eurotik gorako isuna jarri zioten. Baina ez zuela ordainduko erantzun zuen Mensah-k, eta epaitegietan bukatu du. Pasa den astean ebatzi du auzia epaileak: oharra baino ez da izango azkenean, prozesuaren gastuak ordaindu beharko ditu eta baldintzapeko askatasunean egongo da urtebetez; alegia, berriz ere spray-arekin harrapatzen badute, isuna ordaindu beharko du. Baina Mensah ez da kikildu, eta dagoeneko lokalizatuta dauka itxuraldatu nahi duen hurrengo mezua. Azken finean, gorroto mezuak kaleetatik ezabatzeko Justizia ez da hain azkar mugitzen, dio, eta aktibisten kriminalizazioa salatu du.

Lanera bidean hasi zen dena, duela 30 urte

“Nazien Kontra” idatzia duen telazko zorroa eramaten du gainean, eta barruan espatula, esmalte-kentzekoa, trapua, spraya eta gertatzen den guztia idazteko liburua. Erretiratu arte ezgaitasunen bat duten umeekin lan egiten zuen pedagogo terapeutiko honek 1986an ekin zion faxismoaren aurkako gurutzadari, lanera bidean: Hitlerren konfiantzako gizon izandako Rudolph Hess kartzelan zen eta haren askatasuna eskatzen zuen kartela ikusi zuenean, ezin izan zion eutsi, giltzak hartu eta ezabatu egin zuen. “Eta sentsazioa izugarria izan zen”. Horrela hasi zen dena.

“Errefuxiatuak dira etsai berriak”

Gorrotoak bultzaturiko erasoren baten lekuko izan denetan, ez da isilik geratu, eta neonazien aldetik erasoren bat edo beste jasan behar izan du. Rosa Luxemburgo, Nelson Mandela eta Martin Luher King ditu eredu, “Gorrotoak suntsitu egiten du” izeneko erakusketa ibiltaria ere badauka eta arrazakeriaren kontrako eta elkarbizitzaren aldeko tailerrak ematen ditu.

Lanik ez zaio falta Irmela Mensahri: “Errefuxiatuak dira gaur egungo etsai berriak”, dio, eta mezu xenofoboen “gorakada dramatikoa” nabaritu du leku publikoetan, baita mezu horien atzean dauden taldeen kopuruan ere.

Gaiari lotuta:
Paintback: nola egin graffiti ikusgarriak, bide batez naziak izorratuz.