Abesti arrakastatsua jotzeari utzi diote kontzertuetan, indarkeria matxista sustatzen duelako

Atalak: Indarkeria matxista, Musika

Kontzertuetan publikoak La ingrata abestia jotzeko eskatzen dieten arren, duela hilabete batzuetatik euren kantu arrakastatsuenetakoa jotzeari uko egin diote Café Tacvba talde mexikarreko kideek, abestiak sustatzen duen indarkeria matxistaren aurkako kontzientzia garatu dutelako urteotan: “Askok esango dute kantu bat baino ez dela, baina kantuak kultura dira eta kultura horren eraginez jende batek sentitzen du beste norbaiti erasotzeko baimena duela”.

“Balazo pare bat oparitu beharko dizkizut, min egin diezazuten. Eta gehiago ez zaitudalako nirekin izango triste nagoen arren, zurekin izango naiz zure hiletan”. Horra 1994an taldeak konposaturiko abestiaren zati bat, maitaleak utzi duen gizon baten inguruan. Mexikoko musika norteñoa parodiatzeko helburuz sortu zuten arren, jende batek oker interpretatu dezakeela uste dute orain musikariek.

“Konposatu genuenean oso gazteak ginen eta ez ginen hain sentsibilizatuta gai honekiko, baina orain bagaude”, adierazi du taldeko kantariak. Mexikon, bereziki lazgarria da feminizidioa: egunero zazpi emakume hiltzen dituzte batez beste, eta Amnesty International erakundeak esana da, herrialde hartan kasu hauetako asko ez direla feminizidio gisa ikertzen eta horrek inpunitaterako bidea irekitzen duela.