Printzesa lesbianarik ez, oraingoz

Atalak: Haurrak, Hedabideak, Homosexualitatea

Hainbat hedabidek argitaratutakoari kasu eginez, Disneyren film batean printzesa protagonista lesbiana izango dela publikatu dut, baina dirudienez, gezurra da konpainiak halakorik iragarri duenik. Beharbada, Disneyri presioa egiteko edo erreakzioak neurtzeko modua izan da albiste faltsua, LGBTI kolektiboak urteak baitaramatza animazio-faktoriari bestelako ereduak ikusarazi ditzala eskatzen.

Disneyren pelikulek mundu osoan –umeengan– duten eragina ezagututa, ez da berria LGBTI mugimenduen eskaera: gizartean dauden bestelako familia eredu, sexu-joera eta genero-identitate anitzak erakutsi ditzala filmetan.

Eman Elsari neskalaguna

Iaz adibidez, kanpaina arrakastatsua egin zuten sare sozialetan, Frozen filmeko Elsa erreginak hurrengo pelikulan neskalaguna izan dezala eskatuz. Hori bai, #GiveElsaAGirlfriend aldarriak kontra-kanpaina gogorra ere jasan zuen, euren seme-alabak perbertitzea litzatekeela uste duten guraso ugariren haserrea tarteko. Printzesa lesbiana bat, jakina, aurrerapausoa litzateke aniztasuna normalizatzeko bidean, baina oraingoz ez du horrelakorik baieztatu Disney ahaltsuak.

Gaiari lotuta:

Haurrentzako animazioan homosexualitatea normalizatzen

Lehen aldiz, pertsonaia esplizituki homosexuala izango du Disneyren film batek