“Loveless”. Sentimendu tabuak

Atalak: Zinemaldia 2017

Dibortziatu eta bakoitza bere aldetik zoriontsu izan nahi dute, baina euren bizitzak berregin ahal izateko zama bat kendu behar dute gainetik: semea. Posible al da ama batek, aita batek, haien semea ez maitatzea? Galdera batzuek erantzun konplexua dute.

Amak aitortza egiten dio bikotekide berriari: haurdun geratu zen baina ez zuen umea eduki nahi, erditu zenean ere nazka ematen zion jaioberriak, eta oraindik uste du akatsa izan zela semea. “Munstro bat naiz?”, dio. Ez, ez da munstro bat, baina jasotakoa eta ikasitakoa baino ez du errepikatzen, eta maitatzeko gaitasuna ere galdu dezake bihotz izoztuak. Zoriontasuna aurkitu nahi duten bi arima dira Loveless filmeko protagonistak, baina beranduegi izan daiteke, barneko gorroto, frustrazio eta saminek kutsatuta, harreman toxikoetara ohituta baitaude. Semea desagertzeak hartu-emanean jarriko ditu berriz, eta agerian utziko du bizitza berregiteko duten benetako traba ez dela semea.

Aukeran metraje luzeegia du, bai, baina zeinen erakargarria pertsonaien konplexutasuna, zeinen ederrak Mosku hiritzarreko eta baso zabaleko paisaia hotzak (protagonisten sentimenduen pare), eta zeinen interesgarriak XXI. mendeko Errusia autoritario eta kapitalistaz ematen diren zertzeladak. Zeinen ausarta, tabu diren sentimenduak mahai gainean jartzeko apustua.

PERLAK

Loveless

Zuzendaria: Andrey Zvyaginstsev

Gidoilariak: Andrey Zvyaginstsev, Oleg Negin

Aktoreak: Maryana Spivak, Alexey Rozin, Matvey Novikov.

Errusia-Frantzia-Belgika-Alemania, 127 minutu.