Haurrak hiletetara joatea komeni al da?

Atalak: Haurrak, Haurren haziera, heriotza, Hezkuntza

Gertuko norbait hil da eta eramango al dugu haurra beilatokira, hiletara? Eztabaida izan dugu asteburuan eta galdera egin diogu gai hauek jorratzen dituen adituari. Pista argigarriak eman dizkigu, hainbat faktoreren araberakoa baita erantzuna.

“Interesgarriena haurrari edo nerabeari hiletara joateko aukera ematea da, haren iritzia eta nahia entzutea, eta erabaki informatua har dezan, inportantea da haurrari azaltzea zer aurkituko duen”, dio Naroa Martinez psikopedagogoak. Eta beti, bi aldiz galdetu, hasieran baietz erantzun arren aukera izan dezan atzera egiteko.

Denok ez gara berdinak, eta izaerak zeresan handia du azken erabakian. Baina baita aurretik izandako bizipenek ere, heriotza zenbateraino duen presente haur horrek. Horregatik, bide horretan inportantea da aurretiazko lanketa, egunerokoari lotuta dagoen heriotza jorratzea –etxeko landareena, bide bazterrean aurkitu dugun txori batena, herrikidearena…–, heriotza natural bizi ahal izateko. “Normala da inguruko baten heriotza egokitzen zaigunean konturatzea dolua jorratu behar dugula, baina aurretik hilerrira joan bagara paseoan –ez dezan hilerria bakarrik bizipen gogorrekin lotu–, heriotzaz jardun badugu… askoz errazagoa izango da dena, baita haur horrek hiletara joan nahi al duen erabakitzea ere. Ukrainako gerraren harira, ziur naiz haur batek baino gehiagok ekarri duela gaia hizpidera, eta heldu batek baino gehiagok saihestuko zuela horretaz hitz egitea; bada, prest egon behar dugu haurrak dakarren gaiari heltzeko”.

Behin beilatokira joatea erabakiz gero, pausoz pauso joan. Adibidez, kutxa ikustera gerturatu bai ala ez? Dena ez da zuri ala beltz, erdibideak ere badira. Eta une horietan laguntza emozionala funtsezkoa dela dio Martinezek. Horregatik, gurasoak oso minduta badaude heriotzarekin eta emozionalki haurrari arreta eskaintzeko moduan ez badaude, laguntza eskatu dakioke haur horrentzat konfiantzazkoa den beste heldu bati, une horietan akonpainamendua egin diezaion.