Eta zuk zertarako darabilzu ikasgelako gurasoen whatsappa?

Atalak: Euskara, Hezkuntza

Ikasgelako gurasoen whatsapp taldea seme-alaben agenda eramateko gune bilakatu da? Txutxu-mutxuetarako eta irakaslearen jarduna epaitzeko foroa? Ikasleen arteko gatazkez aritzeko lekua? Whatsapp taldea ez da horretarako, gogoratu digute eskolatik.

Argazkia: Freepik

Ohar interesgarria bezain kezkagarria bidali digu semearen eskolako guraso elkarteak, whatsapp taldeen inguruan. Interesgarria, talde horiek zein funtzio duten gogoratzeko baliagarria delako, eta kezkagarria, hainbat erabilera oker orokortuta daudela edo gutxienez nahi baino gehiagotan errepikatzen direla bistaratzen duelako. “Ez zaitez zure seme-alabaren agenda bihurtu. Bere ardura da”, dio oharrak, ikasleek eskolarako zer ikasi eta egin behar duten zehazteko gunea direlako maiz talde hauek.

Ikasleen edo ikasle eta irakasleen arteko harremanean arazoak baldin badaude, guraso taldean horretaz eztabaidatzea ez da ideia ona, nabarmentzen du oharrak; ikuspegi bat puzteko, gatazka elikatzeko/gaiztotzeko eta pertsona jakin batzuk seinalatzeko (etiketa zintzilikatzeko) arriskua egon daiteke. “Zure seme-alabak beste ikasle batekin arazoak baldin baditu, lehenik eta behin, tutorearekin hitz egin. Irakasle edo eskolako langile ez dozenteren batekin arazoren bat baldin baduzu, jarri harremanetan ikastetxearekin”.

Whatsappa da “talde guztirako erabilgarri eta interesgarri den informazioa elkarbanatzeko soilik”, eta txutxu-mutxuak mozteko eta errespetuz jarduteko ere badio: “Aurpegira esango ez zenukeenik, ez idatzi”.

Euskaraz, mesedez

Zentzuzko pautak iruditu zaizkigu etxean, eta hizkuntzaren kudeaketak taldeotan sarri egoera deserosoak eragiten dituenez, agian ez legoke gaizki eskoletatik hori ere jorratzea: D ereduko ikasleen gurasook, whatsapp taldean, hizkuntzaren ikuspegitik zein irizpide nagusi jarraitu beharko genituzkeen adieraztea, euskaraz idatzi duen ama-aitari guraso elebakarrak kargu hartzen dionean heldulekuak izan ditzan. Izan ere, ikastetxeko komunikaziorako hizkuntza ardatza euskara izanik (ez bakarrik ikasgai orduetan eta irakasle-ikasle harremanean), guraso taldean ere euskarak izan behar luke ardatz eta lehentasun.

Ikastetxeko komunikaziorako hizkuntza ardatza euskara izanik, guraso taldean ere euskarak izan behar luke ardatz eta lehentasun

Aldiz, “Eskolako gurasoen whatsapp taldeetan, belarriprest gutxi” artikulua idatzi nuen ARGIAn, halako whatsapp taldeetan maiz gertatzen baita euskaraz idatzi eta baten batek erantzutea “en castellano por favor, para los que no entendemos en euskera”. Ezagututako hiru kasuren berri ematen nuen. Batean, gaztelaniaz egiteko eskatu eta guraso euskaldunak halaxe erantzun zion: “Os pido que la próxima vez que recibáis mensajes en euskara hagáis un esfuerzo por entenderlos y pidáis ayuda a vuestras hijas, para de esta manera no limitar a nadie y que cada uno podamos comunicarnos en el idioma que escojamos”. Alegia, aukeratutako hizkuntzan aritzen da guraso bakoitza. Bigarren kasua: ikastola bateko gurasoek erabaki zuten bi whatsapp talde sortzea, bata euskara hutsean, eta bestea bi eletan; guraso taldeko ordezkaria bi taldeetan dago, eta hark du ardura ikastetxeko kontuekin zerikusia duen informazioa batean eta bestean zabaltzeko. Eta hirugarren errealitatea, eta esango nuke orokortuena: guraso elebakarrak erdaraz mintzo dira eta gainerako guztiek (sarri gehiengo zabala) bi hizkuntzatan idazten dute mezu bakoitza. Enpatiaren eta bakearen izenean amore ematera eta estres linguistikora ohituegi gaude euskaldunok.